DILI, 03 jullu 2023 (TATOLI)- Kontinua fó importansia ba konstrusaun edifísiu Agência TATOLI,I.P no RTTL,Ep ne’ebé mak agora daudaun konklui ona estudu viabilidade, nu’udar rekomendasaun husi Ministru Asuntu Parlmentár no Komunikasaun Sosiál (MAPKOMS) Sesante, Francisco Jerónimo, ba Sekretáriu Estadu Komunikasaun Sosiál (SEKOMS) Expedito Dias Ximenes.
“VIII Governu Konstitusionál nia mandatu mós tau importánsia ba infraestrutura RTTL, Ep no TATOLI, agora halo hela estudu viabildade ba infraestrura ba edifísiu RTTL no TATOLI iha Ai-mutin. Estudu Viabilidade la’o hotu ona, hein konklui de’it no tékniku sira sei aprezenta rezultadu mai Governu foun para haree foti desizaun, para ba futuru harii edifisiu ba RTTL EP no TATOLI,” Francisco Jerónimo iha nia intervensaun bainhira entrega servisu (handover) hosi MAPKOMS no SEKOMS sesante ba SEKOMS atúal no Vise Ministru Asuntu Parlamentár ne’ebé hala’o iha Palásiu Governu, segunda ne’e.
Nia dehan, SEKOMS atuál mós fó importansia ba Estatutu atu haree fila fali TATOLI no RTTL, EP tanba hanesan RTTL nia nu’udar Empreza Públiku nia Estatutu presiza atu haree fila.
MAPKOMS sesante ne’e relata ba SEKOMS atuál katak durante mandatu VIII Governu kontinua halo kooperasaun ho Xina hodi dezenvolve RTTL, EP husi sistema analog ba sistema dijitál ne’ebé hanaran Dijitál Transmisaun Multi Terestre (DTMB, sigla inglés).
MAPKOMS sesante Francisco Jerónimo hateten, kona-ba kontinuasaun dijitalizasaun iha RTTL, EP rasik MAPKOMS mós asina ona ona kontratu kompañia ba instalasaun torre RTTL hamutuk 12 no lansa ona hosi Primeiru Ministru sesante Taur Matan Ruak no husu atu Governu foun tenke kontinua halo instalasaun ba iha Tore ne’e nune’e dijitaliza liután RTTL iha futuru.
Nia dehan, iha mandatu VIII Governu liuhosi MAPKOMS halo konstrusaun ba edifísiu ida iha RTTL, EP atu iha futuru funsionáriu sira bele uza halo serbisu no obra ne’e rasik iha hela faze konstrusaun.
Francisco Jerónimo mós realsa, iha VIII Governu nia mandatu liuhosi MAPKOMS no SEKOMS estabelese sentru informasaun suku iha suku 26 iha territóriu nasionál ho objetivu atu lori governu besik liu povu, nune’e povu sira bele akompaña atividade prosesu dezenvolvimentu iha rai-laran, liuliu atividade Governu nian iha nasionál no iha suku, tanba Konstituisaun garantia ema hotu iha liberdade asesu ba informasaun.
Eis Governante ne’e hateten, iha mandatu VIII Governu Konstitusionál MAPKOMS mós konsege halo lei ne’ebé fó apoiu finansiamentu ba media maske lei ne’e rasik hetan veta hosi Prezidente Repúblika.
Tuir nia katak, durante mandatu Governu da-ualu konsege aprova lei Rádiudivfuzaun, maske iha artigu balun hosi lei ne’e rasik, Prezidente Repúblika veta.
Eis-MAPKOMS, Francisco Jerónimo, iha mandatu VIII Governu konstitusionál MAPKOMS no SEKOMS hamutuk Ministériu Públiku hahú haree esbozu lei kona-ba sibernétika no espera atu SEKOMS foun bele haree kona-ba ida ne’e.
Enkuantu kona-ba servisu Asuntu Parlamentár, Francisco Jerónimo hateten, durante ne’e kria diresaun lima iha parlamentu no servisu seluk mak hametin relasaun di’ak entre parlamentu no órgaun ezekutivu liuhosi reuniaun líder bankada.
“Ida ne’e mak pogresu ne’ebé MAPKOMS no SEKOMS halo durante tinan lima nia laran, agora espera katak responsabilidade tula felai ba exelénsia na’in rua SEKOMS foun no Vise Ministru Asuntu Parlamentár atu kontinua responsablidade ida ne’e ho ita hotu nia apoiu buat hotu sei lao di’ak. Parabéns ba SEKOMS foun no Vise-Ministru Asuntu Parlamentár dezeja susesu nafatin,” Nia salienta.
Ikus liu Francisco Jerónimo mós agradese ba funsionáriu SEKOMS, Diretór no Diretór Jerál sira no kargu Xefia tomak hotu nia apoiu durante ne’e hodi servisu hamutuk ne’ebé durante tinan lima nia laran.
Iha fatin hanesan, Sekretáriu Estadu Komunikasaun Sosiál sesante, Merício Juvinal dos Reis Akara, parabeniza SEKOMS foun Expedito Dias Ximenes no Vise-Ministru Asuntu Parlamentár Aderito Hugo ba konfiansa hodi hodi hola parte iha IX Governu Konstitusionál.
“Dala ida tán, ha’u hato’o ha’u-nia parabéns no votu susesu ba exelénsia na’in rua,” nia kongratula.
Merício hateten, hanesan SEKOMS sesante, prontu apoiu SEKOMS atuál no Vise Ministru Asuntu Parlamentár nia servisu kuandu iha tempu saida de’it presiza nia tulun hanesan Timoroan nia prontu kontribui hanoin hodi dezenvolve setór komunikasaun sosiál iha Timor-Leste.
Hatan kona-ba kestaun ne’e, Sekretariu Estadu Komunikasaun Sosiál Expedito Dias Ximenes, hateten, relatóriu sira ne’e importante no pertinente maibé nia parte sei haree didi’ak, lee lai halo konsultasaun molok foti desizaun atu kontinua programa hirak ne’e.
“Ami foin pose ohin mak ami halo hadover ka entrega servisu ne’ebé ita sei haree saida mak ita sei halo ba oin,” nia dehan.
Jornalista: Natalino Costa
Editór : Rafael Ximenes de A. Belo
