DILI, 03 jullu 2023 (TATOLI) – Xefe Estadu Maiór Jenerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten tempu badak nia-laran Komandu F-FDTL sei nomea Ofisiál Superiór na’in-ida substitui Xefe Estadu Maiór Jenerál F-FDTL Komodoro Pedro Klamar Fuik ne’ebé hetan konfiansa hodi hola parte iha IX Governu.
“Ita sei nomea Ofisiál Superiór hodi troka Komodoro Pedro Klamar Fuik ne’ebé sai ona Ministru Defeza. Iha ne’e sei iha kandidatu Kolonél barak, iha Kolonél antiguidade no iha Kolonél balun rezerva no balun tama ona ba idade reforma”, Falur Rate Laek hateten ba jornalista sira hafoin enkontru dahuluk ho Ministru Defeza Pedro Klamar Fuik iha Kuartel Jenerál F-FDTL, Fatuhada segunda ne’e.
Nia dehan, Xefe Estadu Maiór Jenerál F-FDTL sei konvoka enkontru ho Konsellu Superiór Defeza Militár ne’ebé mak sei hola parte Xefe Estadu Maiór Jenerál, Vise-Xefe Estadu Maiór, Jenerál sira, Brigadeiru sira, Jenerál Reformadu sira, Eis Ministru Defeza hodi koalia kona-ba asuntu ne’e.
“Ha’u sei konvoka reuniuan ho atu sira mós fó solusaun ba vida instituisaun nian”, nia dehan.
Iha biban ne’e, Falur hateten Komandu F-FDTL sei halo nomeasaun mós ba Komandante ba Komponente foun sira.
“Ita sei fó pose ba sira iha fulan agustu nia-laran”, nia adianta.
PR la konsege halo ezonerasaun ba Pedro Klamar Fuik
Falur haktuir, Prezidente Repúblika la konsege halo ezonerasaun ba Xefe Estadu Maiór Jenerál F-FDTL Komodoro Pedro Klamar Fuik tanba kestaun tempu tanba karta hosi Primeiru-Ministru indijitadu iha 27 juñu husu ofisiál superior atu hola parte iha estrutura IX Governu Konstitusionál.
Nia konta, iha momentu ne’eba kedan hanesan Xefe Estadu Maiór Jenerál F-FDTL, konvoka reuniaun ho Konsellu Superiór Defeza Militár hodi hatan ba karta ne’e.
“Ha’u propoin ba Ministru Defeza iha momentu ne’ebá, naran Ofisiál F-FDTL nain ida, hodi hatan ba karta ne’e. Proposta ne’e atu deskute iha Konsellu Ministru, maibé momentu ne’e Konsellu Ministru laiha ona. Entaun ami lori dokumentu ne’e ba de’it Prezidente Repúblika no Prezidente fó proposta ne’e ba Primeiru-Ministru Indijitadu no hili tiha Pedro Klamar Fuik, depois nia simu tiha pose mak foin trata prosesu administrativa”, nia esplika.
Nia realsa, Prezidente Repúblika sei dekreta ezonerasaun Xefe Estadu Maiór Komodoro Pedro Klamar Fuik ne’ebé hetan konfiansa hodi hola parte iha Governu Dasia.
“Prosesu ne’e iha ona Prezidente Republika, ha’u fi’ar katak ohin Prezidente Repúblika dekreta ona, hodi halo ezonerasaun ba nia (Pedro Klamar Fuik) no halo fali nomeasaun ba Xefe Estadu Maiór foun”, nia dehan.
Nia subliña, Pedro Klamar Fuik iha kapasidade lideransa, jestaun atu bele dezenvolve instituisaun defeza no militár. Nia iha kapasidade halo kooperasaun internasionál atu hametin relasaun sira.
Lei n.º 3/2010, de 21 de abril, Lei de Defesa Nasionál artigu 14 aliña F-Prezidente Repúblika mak nomea no ezonera Xefe Estadu Maiór Jenerál Forsa Armada (CEMGFA).
Iha artigu 17 aliña D hosi lei ne’e afirma, proposta nomeasaun Xefe Estadu Maiór Jenerál Forsa Armada, Vise Xefe Estadu Maiór Jenerál no Xefe Estadu Maiór sei aprezenta hosi responsável membru Governu ba Ministru Defeza Propor hodi halo aprovasaun iha Konsellu Ministru.
Jornalista: Natalino Costa
Editór : Zezito Silva
