DILI, 03 jullu 2023 (TATOLI)— Vise Primeiru Ministru no Ministru Assuntu Ekonomiku, Francisco Kalbuadi Lay kompremete sei esforsu aan ho ekipa tomak hodi desenvolve setór tolu turizmu, komersiu no industria hodi diversifika ekonomia rai laran.
Vise Primeiru Ministru ne’ebé kaer mós pasta hanesan Ministru Turizmu Ambiente hato’o lia menon hirak ne’e liu husi serimonia handover husi governante anterior ne’ebé realiza iha Centro Convenção Dili (CCD).
Iha serimonia hand over refere, Eis Ministru Turismu, Komersiu no Industri, Lucas do Carmo da Silva hamutuk ho Vise Mnistru Turismu no Komersiu entrega relatoriu servisu nian durante mandatu ba Vise Primeiru Ministru no Ministru Assuntu Ekonomiku Francisco Kalbuadi Lay no mós Ministru Komersiu Industria, Filipus Nino Pereira inklui Vise Ministru Komersiu, Augusto Júnior Trindade.
“Hanesan Timoroan ita hotu prontu servi ba rai ida ne’e no buat ne’ebé diak ita kontinua no ida ne’ebé sei falta ita sei kompleta. Ita hatene depois COVID-19 mundu destagnadu liu-liu iha area turismu maibe iha tinan ida nia laran komesa rekopera fazeadamente, no ita sei halao tuir knaar tuir ita nia komprimisiu, husi desenvolve mikro no makro empreza sira,” esplika Francisco Kalbuadi.
Nia esplika, lakleur tan Timor-Leste sei sai membru ASEAN no servisu lubuk ida mak sei halo, maibe ASEAN laos prioridade uniku tanba iha buat barak mak presiza hadia, nune’e fiar katak ho vontade ema hotu nian bele dezenvolve tanba povu hein hela.
“Saida mak imi hahu ona no ami sei hatutan mak governasaun ida ne’e sei hatoo nia programa ba Parlamentu no hahu husi ne’eba ita sei servisu lolos tuir OJE (Orsamentu Jeral Estadu) tinan 2024,” nia deklara.
Eis Ministru Turizmu, Komersiu no Industria, Lucas do Carmo da Silva hato’o ninia parabens ba governante foun sira ne’ebé hetan fiar husi povu hodi lidera governasaun dasiak ho lideransa Xanana Gusmão nian.
Eis Governante ne’e rekoñese iha buat barak mak la konsege realiza durante nia mandatu no entrega hikas kompetensia ne’ebé lideransa foun sira hodi bele hatutan no desenvolve Timor-Leste diak liu tan.
“Hau mai iha ne’e atu ita nia jerasaun sira bele banatir tuir no labele iha odi viganza ba malu, maske ita halo buat barak ona maibe buat barak mak preziza halo tan tanba ita seidauk liberta povu husi kiak. Hau entrega relatoriu atividade 2018 too 2023, inklui relatoriu ba ba programa Cesta Bazika,” dehan Nia.
Lucas do Carmo hatete durante tinan tolu mandatu hasoru problema no dezafiu oin-oin hahu husi pandemia ne’ebé halo atividade ekonomia rai laran sai paradu inklui siklone seroja ne’ebé afeta maka’as ba povu sira.
Maske nune’e konsege hamriik metin hodi proteje povu no normaliza hikas fali fali ekonomia rai laran no atinjimentu ne’e hetan tanba servisu metin ho ekipa funsionariu sira hotu.
“Ha’u husu atu funsionariu sira nafatin kopera no servisu diak ho Ministru foun sira tanba ita iha objetivu ida deit mak bem estar no komum ba povu nian. Desenvolvimentu laos estatika no ho esperensia diferente mak hamutuk ita bele alkansa ba oin. Hamutuk ita bele lori nasaun TL ida buras liu,” Nia hakotu.
Reporter : Cidalia Fátima
Editora : Armandina Moniz
