DILI, 03 jullu 2023 (TATOLI)— Ministru Transporte no Komunikasaun (MTK), Miguel Manetelu Marques hateten, IX governu iha ninia programa prioridade rasik ne’ebe sei hato’o ba Parlamentu Nasional.
Nia esplika, programa prioridade ne’ebe MTK iha liga ba transporte marítima, aero, terestre no komunikasaun.
“Sasan sira ne’ebé maka governu anterior halo iha minutu ikus presiza atu halo revizaun, laos dehan atu kontinua saida maka oitavu governu halo. Tanba IX Governu ida ne’e mai ho nia programa rasik, ne’ebé sei aprezenta ba Parlamentu Nasional, hodi hare prioridade sira ne’e,” Miguel Manetelu dehan ba Tatoli iha Serimonia Pose ba membru IX Governu iha Palasiu Presidensial, Dili.
Tuir Ministru Miguel katak, prioridade iha IX governu mak, pasu dahuluk, Ministerio ida-idak sei simu dekretu organika husi IX Governu liu husi Primeiru Ministru, Jose Alexandre Kay Rala Xanana Gusmão.
“Husi ne’eba maka ami bele fo sai, saida mak ami bele halo iha tempu badak, atu responde ba loron 100 nian,” Ministru Miguel dehan.
Nia dehan, hosi programa MTK liga ho transporte no komunikasaun seidauk bele hatene tanba, Organika IX Governu nian rasik seidauk aprova, nune’e seidauk bele hatene. Maibe servisu sei kontinua halao kona ba aviasaun portu, aeroportu, telekomunikasaun, no seluk tan.
“Mais kompetensia tenke iha lei organika ba IX governu nian. Agora lei organika ne’e rasik, sei sai iha semana ne’e nia laran. Sei lei organiku ne’e iha ona, ami bele hare kompetensia atu halao servisu hanesan ministru,” Ministru Miguel deklara.
Aleinde ne’e Ministru ne’e mos sei halo diskusaun ho tekniku sira hodi identifika problema internet, para bele responde ba problema linha internet iha rai laran, hodi bele kontribui ba dezenvolvimentu nasaun ida ne’e.
Jornalista : Mirandolina Barros Soares
Editora : Armandina Moniz
