Top

Ministru Samuel konsidera knaar foun nu’udar responsabilidade todan iha kabas

Ministru Obra Públika sesante, Abel Pires da Silva, entrega relatóriu servisu ba atuál Ministru Obra Publika, Samuel Marçal, iha resintu MOP, Caicoli, segunda (03/07/2023). Imajen Tatoli/Francisco Sony

DILI, 03 jullu 2023 (TATOLI)—Ministru Obra Públika sesante, Abel Pires da Silva ho nia Vise-Ministru, Nicolau Lino Freitas Belo, segunda ne’e, halo transferénsia servisu instituisaun ba atuál Ministru Obra Públika, Samuel Marçal, ho ninia estrutura.

Ministru Obra Publika, Samuel Marçal. Imajen Tatoli/Francisco Sony

Biban ne’e, atuál Ministru, hateten, oportunidade ne’ebé nia hetan hanesan membru Governu nu’udar responsabilidade todan iha kabas.

“Ha’u mai la’ós tanba matenek liu, maibé tanba responsabilidade, nune’e ita hotu sei servisu hamutuk hodi serví ita-nia rain hodi interese povu nian, durante mandatu ne’ebé ha’u simu,” Samuel Marçal dehan durante serimónia transferénsia servisu, iha resintu Ministériu Obra Públika (MOP), Caicoli.

Tuir governante ne’e, atu atinje responsabilidade ne’e maka nia sei la servisu mesak, maibé ho kolaborasaun hosi parte hotu hodi servisu hotu bele la’o di’ak,” nia akresenta.

Notisia Relevante : Ministru Samuel: “Estrada, eletrisidade no bee-moos iha territóriu nasionál sai prioridade”

Vise-Ministru Infrestrutura, Júlio do Carmo. Imajen Tatoli/Francisco Sony

Iha biban hanesan, Vise-Ministru Infraestrutura, Júlio do Carmo, komprometidu sei servisu di’ak hamutuk ho Ministru no funsionáriu MOP tomak hodi haree dezenvolvimentu nasaun.

“Ita hotu sei la’o tuir programa ne’ebé iha no ami mai kontinua de’it saida mak durante ne’e ministru sesante halo no ida seidauk realiza hotu, la’ós ami mai atu halo buat foun,” nia tenik.

Nune’e mós, Ministru sesante, Abel Pires da Silva, hateten, maski termina ona mandatu maibé ba nasaun no interse povu, nia prontu kontinua servisu hamutuk ho Ministru foun iha tempu ne’ebé de’it.

“Ha’u fó parabéns no bem vindu ba Ministru foun ho nia ekipa hanesan Vise-Ministru Infraestrutura no Sekretáriu Estadu Eletrisidade Água no Saneamentu, ne’ebé ba oin sei lidera instituisaun ida-ne’e, rekomenda ita hotu kontinua serví ita-nia povu no rai doben ida-ne’e ho di’ak. Ha’u prontu apoiu imi iha tempu ne’ebé imi presiza ha’u-nia apoiu,” nia akresenta.

Jornalista     : Arminda Fonseca

Editora          : Julia Chatarina

Publisidade

Leave a Reply

Latest Post

error: Content is protected !!