DILI, 03 jullu 2023 (TATOLI) – Ministru Negósiu Estranjeiru no Kooperasaun (MNEK) Bendito Freitas, hatete fronteira terestre entre Timor-Leste no Indonézia to’o agora seidauk finaliza maibé sai asuntu prioridade ba MNEK atu haree iha tempu besik.
“Asuntu entre fronteira ita ho Indonézia, ministériu iha ona ekipa téknika no komisaun ne’ebé trata ba asuntu ida ne’e, tanba ida ne’e ita konsidera asuntu espesiál, ita sei haree atu aselera prosesu”, Bendito dehan ba Agência TATOLI iha Dili foin lalais ne’e.
Nia realsa, asuntu ida ne’e la’os de’it MNEK mesak mak trata maibé sei servisu hamutuk ho Primeiru-Ministru Kay Rala Xanana Gusmão tanba antes ne’e lider karismátiku ne’e mak hala’o servisu iha gabinete fronteira terestre no marítima nian.
“Asuntu ida ne’e la’os MNEK mesak mak haree maibé ida ne’e kompeténsia mós hosi maun boot Kay Rala Xanana Gusmão nian tanba servisu hotu halo iha gabinete fronteira terestre no marítima”, nia dehan.
Ho nune’e, iha tempu besik MNEK sei halo servisu ne’ebé makas atu garante susesu ba povu no nasaun nia hakarak tuir espetativa hosi planu no polítika ne’ebé iha.
Entretantu, Xefe Negosiadór Prinsipál Timor-Leste, Kay Rala Xanana Gusmão, antes ne’e ho Ministru Koordenador ba Asuntu Polítiku no Defeza Wiranto ho Ministru Negósiu Estranjeiru no Kooperasaun Indonézia Retno Marsudi asina ona nota aseitasaun ba finalizasaun fronteira terrestre.
Liuhosi asinatura aseitasaun ne’e konsege konklui ona fronteira terrestre iha segimentu rua hanesan Noelbesi-Citrana no Bijael Sunan-Oben.
Área Noelbesi-Citrana hanesan fronteira ho Kupang Nusa Tengara Timur (NTT) no Oé-Cusse Ambeno hanesan parte Timor-Leste nian.
Nune’e mós, Bijael Sunan-Oben hanesan fronteira Tengah Utara ne’ebé sai parte hosi NTT no Oé-Cusse Ambeno ho medida ektare 142,7.
Jornalista: Hortencio Sanche
Editór : Zezito Silva
