DILI, 03 jullu 2023 (TATOLI)— Ministru Transporte no Komunikasaun (MTK) sesante, Jose Agustinho do Carmo, rekomenda ba Ministru MTK foun hosi IX Governasaun, Miguel Manetelu Marques, atu bele kontinua rekonstrusaun fila fali portu Dili ba Sentru Turismu Konsellu Internasional.
“Portu Dili, bao in oinsa maka bele halo fali rekonstrusaun para ninia funsaun ne’e ita muda ba fali sentru Turismu Konsellu Internasional. Tanba, obra ida ne’e aprova ona iha Konsellu Ministru wainhira ha’u aprezenta no estudu abilidade hala’o husi Ajensia Dezenvolvimentu Estadu Unidus Amerika ne’ebe konklui ona. Tanba ne’e, iha IX Governasaun bele avansa ho konkursu, hodi halao ninia konstrusaun fiziku,” Ministru MTK sesante, Jose Agustinho dehan ba jornalista sira hafoin serimonia entrega servisu ba Ministru MTK atual, iha Edifisiu MTK Caicoli, segunda ne’e.
Ministru sesante Jose Carmo espera, ministru foun bele servi povu ho nasaun ho diak hodi bele fo benefisiu para hadia dezenvolvimentu no povu nia moris ba oin. Tanba ida ne’e nu’udar komprimisiu partidu politiku sira nian durante kampaña.
“Ohin ha’u entrega servisu oitavu Governu Konstitusional nian ba membru governu foun mak hanesan Ministru MTK Atuál, Miguel Manetelu Marques hodi kontinua servisu,” nia haktuir.
Nia relata katak, durante ninia mandatu konsege hatama ona reseita lubuk ida ba kofre estadu.
“Iha mandatu oitavu Governu Konstitusional ita konsege konklui ita nia investimentu estratejia importante tebes, ne’ebe maka tama ona iha faze operasional, hanesan Portu Baia Tibar, nomos obra sira ne’ebe mak lao hela no seluk tan,” Ministru ne’e dehan.
Nune’e mos, iha fatin hanesan Ministru MTK Atuál, Miguel Manetelu Marques hateten, iha loron dahuluk to loron 120, sei halo aprenzentasaun programa ba prioridade liga ho transporte no komunikasaun ba Konsellu Ministru.
Jornalista : Mirandolina Barros Soares
Editora : Armandina Moniz
