Empreza Habib Leste fornese gratuitamente uniforme ‘batik’ ba profesór Eskola 12 Novembru
DILI, 04 jullu 2023 (TATOLI) – Profesór na’in-74 husi Eskola Sekundária Jerál (ESG) 12 Novembru Bekora hetan gratuitamente uniforme ho motivu batik husi empreza Habib Leste, tanba kada anu letivu eskola refere sempre tau fiar ba kompañia ne’e hodi suku farda ba alunu sira.
Adjuntu-Diretór Eskola 12 Novembru, Jacinto Freitas, dehan farda ne’e sira uza ona iha serimónia entrega eskola foun husi Ministru Edukasaun, Juventude no Desportu sesante, Armindo Maia, foin lalais ne’e.
“Farda batik ne’ebé ita uza ne’e la’ós ita hasai osan Estadu nian maka suku, maibé ne’e oferese husi kompañia estranjeira ida ne’ebé durante ne’e ita kria kooperasaun di’ak hodi apoia farda ba estudante sira kada tinan letivu foun,” Jacinto Freitas dehan asuntu ne’e ba Tatoli iha Bekora.
Nia hatete Habib Leste fornese ona farda refere ba manorin sira dala tolu ona, tanba kooperasaun ne’e hahú kedan iha 2016 to’o ohin loron.
“Kooperasaun entre Eskola 12 Novembru no kompañia ne’e sempre la’o di’ak no bainhira empreza kumpre ona ninia obrigasaun hodi prepara farda ba estudante sira no eskola mós kumpre ninia devér hodi halo pagamentu bá sira, nune’e maka kompañia sente katak konfiansa ne’ebé eskola fó ba sira nunka iha falla, entaun sira mós hakarak oferese tan uniforme foun seluk ho motif batik bá profesór sira ho gratuita atubele uza hodi troka fali uniforme sira ne’ebé maka antes ne’e iha ona, maibé barak maka bosan ona”, nia esplika.
Adjuntu ne’e salienta liga ba preokupasaun públika nian katak tanba saida mak Eskola 12 Novembru la promove tais hodi suku farda, maibé dezenvolve fali batik ba uniforme profesór sira, “maibé ha’u hakarak dehan ita la hasai osan hodi suku farda, ne’e eskola hetan ho gratuita de’it”, nia reiteira.
Jacinto Freitas akresenta katak bainhira eskola mak foti desizaun hodi suku farda batik no la promove fali tais Timór ne’e konsidera falla boot ida maka eskola halo ona, maibé buat sira ne’e hotu lahanesan interpretasaun ne’ebé públiku sira kestiona.
“Bainhira kompañia mak suku farda tais ba profesór 12 Novembru parese empreza mós hanoin didi’ak, tanba agora tais ida de’it ninia presu kuaze $50 ba leten. Se kompañia suku duni ba profesór 74 ne’e, sira sei gasta maka’as liu”, realsa.
Jornalista: Tomé Amado
Editora: Maria Auxiliadora
