DILI, 05 jullu 2023 (TATOLI) – Udan no anin-boot ne’ebé akontese iha loron 03 jullu halo ai tohar hodi danifika edifísiu Eskola Bázika Filiál (EBF) Katólika Seloi, iha munisípiu Aileu.
Diretór Servisu Edukasaun Munisípiu Aileu, Carlito Pereira, informa katak ai tohar ne’ebé danifika sala aeskola EBF Katólika Seloi ne’e akontese iha oras 22h00.
“Ha’u simu informasaun katak ai ida iha eskola EBF sorin tohar no estraga sala aula ida, maibé la afeta ba ema nia vida. Agora daudaun komunidade sira komesa tesi ona ai sira, nune’e estudante sira bele eskola filafali”, Carlito Pereira afirma asuntu ne’e ba Tatoli via telefone, kuarta ne’e.
“Ita-nian dirijente no superintendente edukasaun munisipál Aileu halo ona monitorizasaun depois sei relata mai ha’u atubele submete informasaun mai nasionál hodi bele hetan apoiu”, salienta.
Eskola Katólika Seloi iha edifísiu rua ho sala aula neen. Iha estudante hamutuk 216 ne’ebé provizoriamente seidauk bele tuir prosesu aprendizajen, tanba sei antisipa hela situasaun seluk ne’ebé bele akontese tuirmai tanba daudaun udan no anin seiduak para.
Jornalista: Tomé Amado
Editora: Maria Auxiliadora
