DILI, 05 jullu 2023 (TATOLI) – Sekretáriu Estadu Peska (SEP), Domingos da Conceição dos Santos hateten, iha governasaun ida ne’e sei tau importánsia hodi dezenvolve no industrializa setór peska iha Timor-Leste.
“Programa prioridade iha peska ne’e mak tenke industrializa iha setor peska nian, programa hotu ita elabora ona sei haruka ba Parlamentu Nasionál iha tempu besik,” Domingos ba Agência Tatoli iha Palásiu Governu, kuarta ne’e.
Governante ne’e dehan, durante tempu naruk nia laran Timor-Leste seidauk dezenvolve peska ho di’ak atu nune’e bele hatama reseita ba Estadu.
Tanba ne’e programa no planu durante périodu mandatu elabora ona, hein finaliza nune’e lori ba aprezenta iha Parlamentu Nasionál halo aprovasaun nune’e bele halo servisu.
“Durante ne’e ita-nia peskadór sira sei utiliza materiál manuál hodi halo peska, entaun buat hotu ita tau ona iha programa hein lori de’it ba Parlamentu ona, tanba ita hatene peska ne’e bainhira dezenvolve di’ak hatama reseita ba Estadu,” Sekretariu Estadu ne’e rekoñese.
Tuir ezekutivu ne’e, Timor-Leste, jeografikamente, hale’u ho tasi ne’ebé luan ho nune’e tenke tau prioridade ba peska atu nune’e kria kampu traballu ba timoroan- sira.
Timor-Leste iha liña kosteira ida, liu Km 700, no Zona Ekonómika Eskluziva ida ho besik Km2 72.000, ne’ebé signifika asesu ba rekursu marítimu (rekursu tasi nian) ho potensiál bo’ot ida ba esplorasaun, iha ámbitu setór peska nian
Entre janeiru no agostu 2018), Timor-Leste lakon ikan 4000 iha tasi, ekivale purvolta millaun $236 tanba atividade ilegál, kauza husi falta roo boot atu kontrola
Ho nune’e IX Governu tau prioridade ba peska atu nune’e servisu hamutuk ho Ministériu Defeza (MD) no Ministériu Interiór (MI) atu nune’e bele evita peska ilegál iha tasi liuliu parte súl nian.
Jornalista : Hortencio Sanchez
Editór : Rafael Ximenes de A. Belo
