DILI, 05 jullu 2023 (TATOLI) – Ministru Juventude Desportu no Arte Kultura (MJDAK), Nélio Isaac Sarmento informa, tempu besik sei konvoka reuniaun ida ho lider Grupu Arte Marsiál (GAM) sira hotu hodi ko’alia kona-ba atividade ne’ebé durante ne’e iha no nia kontinuasaun.“Iha tempu besik ha’u sei hasoru malu ho líder Arte Marsiál sira hotu, inklui modalidade desportu sira hotu atu haree sira-nia planu interna organizasaun nian no haree ba oin saida mak sira sei halo,” Nélio Isac ba Agência TATOLI iha Palasiu Governu, kuarta ne’e.
Hanesan Governante, tuir ezekutivu ne’e, nafatin fó espasu ba modalidade desportiva no GAM sira hotu atu hala’o atividade ne’ebé durante ne’e hala’o ona.
“GAM kontinua eziste iha ita-nia nasaun ne’e. Ha’u hanesan Governante espera katak sira bele prátika nafatin atividade desportu ho espíritu di’ak atu nune’e bele reprezenta ita-nia nasaun iha eventu internasionál sira,” nia dehan.
Membru Governu ne’e dehan, kona-ba GAM sira ne’ebé sei fó graduasaun ba membru foun sira iha fulan oin nafatin la’o no Governu nafatin apoiu másimu.
Tuir orariu ne’ebé iha organizasaun Persaudaraan Setia Hati Terate (PSHT) sei fó graduasaun ba membru foun iha fulan agostu nia laran.
Membru foun PSHT nian ne’ebé prepara ba graduasaun agora tuir dadus provizóriu hamutuk rihun-100-resin iha territóriu nasionál.
Tanba ne’e, nia husu ba GAM hirak ne’ebé kada tinan fó graduasaun ba membru sira ho númeru ne’ebé bo’ot labele hela de’it ho nível ne’ebé iha maibé koko hatudu prestasaun atu bele ba kompete iha eventu internasionál.
“Ha’u iha hanoin lubuk ida ho PSHT rasik, ne’ebé iha reuniaun ha’u sei ko’alia ho sira, atu nune’e sira intende ba oin ita bele koopera ho di’ak atu haree ba atividade desportu nian tanba ha’u rasik hakarak sira sai atleta ne’ebé sportif atu bele ba kompete iha eventu internasionál,” nia hakotu.
Jornalista: Hortencio Sanchez
Editór: Rafael Ximenes de A. Belo
