iklan

EDUKASAUN, HEADLINE, MANUFAHI

Ponte kotu difikulta alunu sira tuir prosesu aprendizajen iha Same Vila

Ponte kotu difikulta alunu sira tuir prosesu aprendizajen iha Same Vila

Diretór Edukasaun Munisípiu Manufahi, Trinito Sarmento. Imajen Tatoli/Domingos Piedade Freitas

DILI, 05 jullu 2023 (TATOLI) – Ponte ne’ebé alunu sira husi Eskola Sekundária 1912, Eskola Bázika Sentrál no CAFE iha Same Vila, munisípiu Manufahi, baibain asesu kotu, nune’e prejudika sira atu tuir prosesu aprendijazen.

Diretór Servisu Edukasaun Munisípiu Manufahi, Trinito Sarmento, haktuir mota Aba-tuu ne’ebé tun husi Holarua ne’e mak kotu totál, entaun estudante sira husi mota-sorin difísil atu asesu bá eskola.

“Ha’u husu ona ba dirijente eskola tolu ne’e atu pasa nafatin informasaun ba estudante sira hodi kuidadu nafatin sira-nia aan bainhira atu ultrapasa mota Aba-tuu ne’e”, Trinito informa asuntu ba Tatoli via telefone, kuarta ne’e.

Nia dehan tanba udan sei tau hela no mota mós seidauk menus maka husu estudante sira labele foti risku, maski ekipa Bombeiru ho komunidade sira apoiu ona ponte emerjénsia ida atu komunidade no estudante sira bele uza bá-mai hodi hala’o ida-idak nia atividade.

“Hanesan ema ne’ebé responsavel ba komunidade edukativa, nia kontinua alerta atu estudante no profesór sira tenke kuidadu nafatin ida-idak nia-aan atu labele monu ba risku sira ne’e”, dehan.

Ho problema ponte kotu ne’e difikukta alunu 3.100 ne’ebé eskola iha Same Vila, kompostu husi estudante Sekundária 1912 hamutuk 1.900, CAFE 600 no Eskola Bázika Sentrál 600.

Entre loron 03 no 04 jullu atividade aprendizajen ba estudante sira labele la’o, tanba udan tau maka’as halo ponte kotu.

“Agora udan nafatin tun hela maske ho volume ki’ik, maibé ha’u nafatin halo update informasaun ba eskola sira atu fó nafatin atensaun ba malu hodi hadook-aan husi risku sira ne’e”, realsa.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!