Servisu Alimentár Covalima sei halo lavantamentu dadus ba produtu lokál
COVALIMA, 05 jullu 2023 (TATOLI)–Diretór Servisu Munisipál Alimetár Covalima, Domingos Gusmão, hateten Diresaun alimentár sei halo levantamentu dadus produtu lokál iha Covalima hodi halo komparasaun ba produtu importadu sira.
“Ita submete ona planu asaun anuál tinan 2024 atu halo rekrutamentu funsionáriu na’in-ida atu halo lavantamentu dadus iha suku ba estensionista, nune’e bele iha balansu produtu munisípiu no produ importadu, ita presiza iha dadus. Ita bele rekomenda ba instituisaun relevante no ba ita-nia superiór oinsá bele halo planu ida di’ak, atu redús númeru importasaun rasik,” Domingos Gusmão hateten ba Agência Tatoli iha nia kna’ar fatin Bairru Costa, Covalima, kuarta ne’e.
Razaun presiza halo lavantamentu dadus, tanba atu hatene dadus iha munisípiu liu-liu dadus produsaun no bele halo komparasaun dadus produtu importadu no mós produsaun iha rai-laran kada époka.
Diretór ne’e dehan, atu halo lavantamentu dadus produsaun tanba atu hatene produsaun rai-laran kada époka prodús kuantidade produtu iha munisípiu, nune’e sai baze dadus planeamentu ba futuru.
Atu halo lavantamentu dadus foku mós ba emprezáriu distribuidór foos sira iha Covalima, nune’e bele hatene estoke foos no produsaun kada époka tonelada hira no mós iha alfandega iha tonelada hira/
Nia dehan, presiza hatene tanba dadus neé sai baze planeamentu ba futuru entre dadus produsaun rai laran no produtu importadu, nune’e bele halo balansu.
Aleinde ne’e, diretór ne’e mós informa kona-ba menus fasilidade hanesan laiha komputadór atu fasilita hodi hala’o servisu no mós menus rekursu umanu, menus finanseira no transporte iha Dirasaun alimentár.
“Ami durante hala’o servisu hasoru difikuldade hanesan menus rukursu umanu, finanseira, fasilidade hanesan laiha transporte ami uza ba postu administrativu sira. Ami iha de’it motorizada tolu (3), uza hodi halo movimentu lokál no laiha komputadór halo servisu,” nia hateten.
Kona-ba problema menus fasilidade ne’e liuliu laiha komputadór ne’e, diretór refere submete ona pedidu maibé seidauk iha rezultadu, tanba iha Administrasaun Munisípiu Covalima seidauk iha estoke komputadór.
Maske hasoru difikuldade maibé sira-nia parte la lakon vontade no espíritu kontinua hala’o servisu bazea ba kondisaun ne’ebé iha.
Tuir dadus, funsionáriu ne’ebé servisu iha dirasaun alimentár Covalima hamutuk na’in-sian (9) ne’e,diretór na’in-ida (1), xefe departamentu na’in-rua (2), kazuál tékniku ofisiál finansa na’in-ida (1), nune’e la sufisénte atu hala’o servisu.
Jornalista : Celestina Teles
Editór : Cancio Ximenes
