DILI, 06 jullu 2023 (TATOLI) – Joven rezisténsia 1996, Celcio Ximenes de Oliveira, entrega karta orientasaun rua ne’ebé nia simu husi Komandante ein Xefe, Kay Rala Xanana Gusmão, ba Arkivu Muzeu Rezisténsia Timorense (AMRT) atu prezerva nu’udar dokumentu luta nian.
“Ha’u mai atu entrega karta rua ne’ebé ha’u iha sente valór tebetebes ba ha’u-nian moris, tanba ha’u simu orientasaun husi Komandante ein Xefe, Kay Rala Xanana Gusmão, husi Cipinang [Indonézia] iha fatin kloot molok ha’u dezloka bá Portugál atu hatutan luta klandestina iha diáspora”, Celcio hatete iha edifísiu AMRT, kuarta ne’e.
Karta ne’e rasik joven rezisténsia ne’e kuída iha ninia vida tomak durante tinan 27 nia laran no iha 05 jullu entrega ba AMRT atu prezerva nu’udar dokumentu luta ida. Karta rua ne’ebé Xanana fó ba Celcio Oliveira ne’e hodi lori sai bá diáspora atu hatutan ba komunidade joven no azilu polítiku Timór sira iha rai-li’ur.
“Karta rua ne’e ninia orientasaun lahanesan. Ida Komandante ein Xefe husu mai ha’u atu ko’alia ho maluk UDT sira, tanba durante luta nia laran mosu diferensa hanoin kona-ba liafuan CNRM ho CNRT. Oinsá atu konvense sira hodi bele kontinua fó apoiu ba luta Timór nian iha diáspora hodi bele atinje objetivu ba ukun rasik-aan”, dehan.
Iha karta seluk ne’ebé simu atu habelar fali ba joven no azilu polítiku sira iha rai-li’ur atu nafatin iha maturidade polítika hodi bele atinje mehi nasaun nian ba ukun rasik-aan.
“Ha’u simu karta segundu husi maun Boot Kay Rala Xanana Gusmão ne’e, nia husu mai ha’u atu ko’alia ho juventude no azilu polítiku sira atu respeita funu no kontinua respeita ita-nian líder sira iha rai-li’ur, inklui mós atu respeita grupu solidariedade internasionál sira iha rai-li’ur ne’ebé fó apoiu ba ita-nian luta atu hetan ukun rasik-aan”, nia konta.
Hafoin tinan 27 nia laran, Celcio Oliveira sente katak tempu ona tenke entrega hikas dokumentu importante ida ne’e atu tau filafali iha ninia fatin, tanba ida ne’e hanesan xamamentu ida ne’ebé todan iha tempu ne’ebá, maibé ho morál ne’ebé iha konsege hala’o duni ho responsabilidade.
“Ha’u sente tokante iha ha’u-nian fuan kuandu ha’u mai direta iha Museu Rezisténsia Timorense nian hodi entrega obra da luta ida ne’ebé konsidera nu’udar jornada moris ida, jornada sofrimentu juventude iha tempu ne’ebá hodi husik buat hotu, estudu no família, atubele manán rai ida ne’ebé ohin loron ita bolu Timor-Leste. Ha’u-nian luta ba ukun rasik-aan ne’e uituan liu, maibé ha’u bele halo luta ida ne’e tanba morál”, haktuir.
Iha serimónia entrega karta ne’e ba AMRT, Celcio Oliveira, konta nia istória badak moris nian iha família nia laran to’o nia sai bá rai-li’ur hodi hatutan luta klandestina ne’e.
Celcio hanoin hikas bainhira nia halo tinan haat nia aman mate tanba konsekuénsia husi funu, nia inan faluk ho forsa tomak tau-matan, haki’ak no kuidadu nia no maun-alin na’in-tolu iha situasaun ida difísil tebes. Hanesan testemuña moris ida nia nunka haluha sofrimentu ne’ebé nia inan faluk halo ba sira, tanba sakrifísiu inan nian sei latroka ho buat ida.
Celcio Oliveira iha nia vida joven simu ona responsabilidade hodi hahú envolve-aan iha atividade klandestina sira hodi komesa luta iha jornada juventude iha Dili ne’ebé koñesidu ho naran Luta Urbana.
Husi Dili, Celcio hahú hakat bá Indonézia-Jakarta ho objetivu ida atu lori Timor-Leste tama iha Indonézia nia leet atu konvense nia povu sira hodi apoia luta timoroan nian ba ukun rasik-aan. “Luta klandestina iha Indonézia ne’e konsege lori nia la’o hamutuk ho saudozu Fernando Lasama, Avelino Coelho no Virgílio Guterres”. Nia konta katak dala ruma entre sira mosu diferensa iha hanoin sira, maibé sira nafatin iha objetivu komún ida maka Timor-Leste tenke ukun rasik-aan.
Iha sorin seluk, Diretór-Ezekutivu no Prezidente AMRT, Hamar Antoninho Baptista Alves, orgullu ho sentidu Estadu ne’ebé hatudu ona husi joven rezisténsia Celcio Oliveira nian ne’ebé apoia tan dokumentu luta nian ne’ebé importante tebes atu sai referénsia ida bá futuru.
Nia realsa katak prosesu entrega dokumentu luta sira ne’e la’ós obrigatóriu, maibé hanesan testamuña ida atubele pasa informasaun katak dokumentu sira ne’e importante ba jerasaun foun sira tuirmai.
“Agora, dokumentu sira ne’e kuandu iha valór duni ka iha duni nesesidade atu prezerva hodi sai arkivu ida iha futuru atu jerasaun foun sira bele aproveita, entaun testemuñu sira iha obrigasaun bele entrega mai AMRT atubele hetan tratamentu no kuidadu liután”, afirma.
Jornalista: Tomé Amado
Editora: Maria Auxiliadora
