DILI, 06 jullu 2023 (TATOLI) – Diretór Eskola Sekundária Tékniku-Vokasionál (ESTV) Becora, Feliciano Belo, husu Ministériu Edukasaun atu apoia ekipamentu, liuliu iha konstrusaun sivíl no karpitaria atu fasilita alunu sira halo prátika.
“Durante ne’e ami hato’o ona proposta ba Ministériu Edukasaun (ME) atu husu apoiu orsamentu hodi sosa ekipamentu foun ba prátika nian atu tulun estudante sira, maibé Governu dehan osan laiha. Ne’e duni ami-nian proposta orsamentu ne’e la konsege realiza”, dirijente informa asuntu ne’e ba Tatoli iha Becora.
Nune’e Feliciano Belo husu ba IX Governu, liuhusi Sekretáriu Estadu Ensinu Sekundáriu no Eskola Téknika (SEESET) atu iha loron 120 ne’e bele tau prioridade hodi apoia materiál foun ba eskola refere.
Ekipamentu ne’ebé eskola ne’e presiza mak hanesan mákina supila moderna no manuál, meza ba prátika no seluk tan.
Responsavel ne’e espera katak ho lideransa foun husi Ministra Edukasaun, Dulce de Jesus Soares, ho ninia Sekretáriu Estadu, Domingos Lopez Lemos, ne’e bele halo netik mudansa radikál ruma ba Eskola Tékniku-Vokasionál sira atubele hetan rekursu materiál ida adekuadu hodi fasilita di’ak liu estudante sira iha eskola refere.
Feliciano Belo esplika katak ESTV sira diferente ho Eskola Sekundáriu Jerál sira, tanba alunu sira ne’ebé hili dalan tama iha ESTV sira ne’e atu prepara-aan ba futuru hodi bele kompete iha merkadu traballu sira. “Maibé, prezensa eskola tékniku sira inklui eskola Bekora ne’e ladún hetan apoiu másimu husi Governu”.
ESTV Becora solisita ba Governu atu sosa ekipamentu foun tanba materiál sira ne’ebé eskola uza ne’e oferese husi KOICA no sira-nian sasán ne’e difísil atu hetan iha loja sira.
“Ami hakarak troka fali ekipamentu ho foun husi Indonézia, nune’e fasil bele hetan lalais iha loja sira no bainhira atu halo manutensaun mós nia gastu ki’ik”, afirma.
ESTV Becora ne’e iha departamentu neen, kompostu husi Mekánika Produsaun, Eletrisidade, Eletrónika, Konstrusaun Sivíl, Informátika no Mekánika Automotif. Husi kursu neen ne’e pratika 70% no teoria 30%.
Sekretáriu Estadu Edukasaun, Domingos Lopez Lemos, afirma katak preokupasaun eskola tékniku sira-nian sai mós nia preokupasaun, tanba ne’e molok atu ko’alia kona-ba apoiu saida maka Ministériu Edukasaun no SEESET atu halo hodi dezenvolve eskola sira.
“Ha’u konsidera tebes preokupasaun mai husi eskola sira no ha’u sei vizita sira hodi haree sira-nian kondisaun, nune’e rona difikuldade saida maka sira enfrenta durante ne’e atu iha loron 120. Ha’u bele halo planu ba preokupasaun sira ne’e”, nia garante.
ESTV presiza tan manorin 12
Aleinde ne’e, diretór eskola husu ba ME atu koloka profesór 12 kualifikadu iha dixiplina jerál no tékniku hodi tulun prosesu aprendizajen ba alunu hamutuk 1.571. ESTV iha profesór hamutuk 72, maibé na’in-neen tama ona ba idade reforma, haat mate no neen la ativu ona no hela de’it 61.
Feliciano Belo dehan presiza manorin sira ne’e hodi garante kualidade estudante sira, nune’e iha futuru bele kompete iha merkadu traballu.
“Ami presiza liu maka profesór kualifikadu iha dixiplina jerál, inglés portugés, matemátika, kímika no fízika. Agora, ba profesór tékniku hanesan eletrisidade na’in-haat no informátika rua”, afirma.
Jornalista: Tomé Amado
Editora: Maria Auxiliadora
