Falur: Manutensaun ró komponente navál besik konklui

DILI, 06 jullu 2023 (TATOLI) – Xefe Estadu Maiór Jenerál F-FDTL, Tenente Jenerál F-FDTL, Domingos Raul Falur Rate Laek, hateten Empreza Wikas besik finaliza ona prosesu manutensaun ba ró komponente navál.

“Ita bele dehan ró komponente navál iha ida mak besik finaliza ona ninia manutensaun. Ita bele dehan kompañia halo manutensaun atinje 90%, hodi hatún ba tasi laran. Ró ida prepara hasae tán fali ba rai maran, nune’e kompañia atu hahú halo ninia manutensaun”, Falur hateten ba jornalista sira iha Kuartel F-FDTL, Fatuhada, kinta ne’e.

Nia dehan, iha mós ró navál nian ida ne’ebé doasaun hosi nasaun balun, agora para hela iha tasi portu Díli, nune’e Komandante Navál fó hatene Xefe Estadu Maiór Jenerál F-FDTL atu halo desmantelamentu.

“Foin dadauk ha’u orienta ona hodi desmantela ró refere hodi hasai materiál funu husi ró ne’e nia laran hodi bele tula turista sira ne’ebé hakarak la’o ba vizita iha Timor-Leste”, Falur informa.

Antes ne’e, emepreza Wikas mak sai manán nain ba konkursu manutensaun ba ró komponente navál rua, Jaco no Betano, ne’ebé halo hosi Ministériu Defeza iha tempu Govern Konstitusionál Daualu.

Jornalista: Natalino Costa

Editór : Zezito Silva