Komandu F-FDTL hili Koronél Trix substitui Klamar Fuik
DILI, 06 jullu 2023 (TATOLI) – Komandu F-FDTL liuhosi reuniaun Konsellu Superiór Militár ne’ebé hala’o iha 28 juñu deside ho votu unanimidade hodi hili Koronél José da Costa Soares ‘Trix’ atu sai Xefe Estadu Maiór F-FDTL hodi substitui Donanciano Gomes Pedro Klamar Fuik ne’ebé hola parte ona iha estrutura IX Governu.
Tuir Xefe Estadu Maiór Jenerál F-FDTL, Tenente Jenerál Domingos Raul Falur Rate Laek, afirma Konsellu Superiór Militár ho votu unanimidade hodi eskolle Koronél Trix ba Xefe Estadu Maiór Jenerál F-FDTL foun.
Nia dehan, proposta nomeasaun ba Xefe Estadu Maiór F-FDTL foun, Komandu F-FDTL entrga ona ba atuál Ministru Defeza Donanciano Gomes Pedro Klamar Fuik atu lori ba Kosellu Minstru depois Governu sei aprezenta ba Prezidente Repúblika, José Ramos Horta mak iha kompetensia atu nomea.
“Agora Xefe Estadu Maiór Jenerál F-FDTL foun mós proposta ha’u haruka ba Ministru Defeza atuál atu aprezenta ba Governu, nune’e Governu aprova iha Konsellu Ministru hodi aprezenta ba Prezidente Repúblika atu halo nomeasaun. Xefe Estadu Maiór Jenerál F-FDTL foun Koronél Trix. Atu halo promosaun ba nia hanesan Xefe Estadu Maiór, ida ne’e proposta ba ona, Prezidente Repúblika promove Trix ba Xefe Estadu Maiór”, Falur Rate Laek hateten ba jornalista sira iha Kuartel F-FDTL, Fatuhada, kinta ne’e
Falur konta, Koronél Trix ema ne’ebé mak iha kapasidade di’ak no iha kresimentu forsa nian, iha fé atu kontinua dezenvolve forsa armada.
“Koronél Trix nia mós uluk hola parte iha Estadu Maiór, nia hatene situsaun hotu, nia ema abilitadu, ema matenek, intelijente no inteletuál. Ohin loron konjuntura atuál nasionál ne’e ita bele dehan tranferénsia nee’ tenke ema ne’ebé kaer atu dezenvolve rai ida ne’e, ema hothotu tenke iha kapasidade akadémiku profisionál, ema inteletuál aatu bele dezenvolve instituisaun ne’e”, nia informa.
Tenente Jenerál ne’e hatutan, Koronél Trix hanesan Koronél ida ne’ebé mak veternu, gerilleiru, uluk hanesan Kolaboradór Estadu Maiór Falintil iha ai-laran no veterenu ida ne’ebé esperiénsia tanba frekuenta formasaun barak no Koronél mais antigu liu iha Instituisaun F-FDTL.
“Tanba ne’e mak Konsellu Superiór Militár vota ho unanimilidade hodi nomea no halo promosaun ba Xefe Estadu Maiór hodi asume pasta ida ne’e to’o nia reforma iha tinan rua. Agora proposta nomeasaun ba ona, hein Prezidente Repúblika halo nomeasaun ba nia hanesan Xefe Estadu Maiór F-FDTL”, nia adianta.
Falur bolu ona Koronél Trix hodi asume kargu hanesan Xefe Estadu Maiór F-FDTL interinu.
“Ha’u bolu ona nia mai iha ne’e atu asume kargu Xefe Estadu Maiór F-FDTL interinu hodi hein Prezidente Repúblika halo nomeasaun ofisiál ba nia hanesan Xefe Estadu Maiór”, nia dehan.
Falur dehan, sei la duvida ho kapasidade Koronél Trix tanba ne’e depozita konfiansa tomak ba Koronél Trix, tanba nia mós ema mak hola parte iha ezisténsia no dezenvolvimentu F-FDTL iha tinan 20 resin nia-laran.
Falur nomea komandante komponente interinu
Xefe Estadu Maiór Jenerál F-FDTL Tenente Jenerál Domingos Raul Falur Rate Laek nomea Koronél Domingos da Costa Soares ‘Dobu’ ba Komandante Komponente Terestre Interinu hodi troka nia Komandante Komponente Terestre José da Costa Soares Trix’ ne’ebé hetan fiar hosi Xefe Estadu Maiór Jenerál F-FDTL Falur Rate Laek hodi asume kargu Xefe Estadu Maiór F-FDTL interinu.
Falur nomea Tenente Koronél Abel da Costa Xavier ‘Nicky’ atuál Komandante Unidade Polísia Militár ba asume fali kargu Komandante Unidade FALINTIL Interinu.
Iha lei n.º 3/2010, de 21 de abril, Lei de Defesa Nasionál artigu 14 aliña F-Prezidente Repúblika mak nomea no ezonera Xefe Estadu Maiór Jenerák Forsa Armada (CEMGFA).
Artigu 17 aliña D hosi lei ne’e afirma, proposta nomeasaun ba Xefe Estadu Maiór Jenerál Forsa Armada Vise Xefe Estadu Maiór Jenerál no Xefe Estadu Maiór inklui Komandante Komponente sira sei aprezenta hosi responsavél membru Governu ne’ebé reponavél ba Ministru Defeza Propoin ba Governu hodi halo aprovasaun iha Konsellu Ministru.
Jornalista: Natalino Costa
Editór : Zezito Silva
