Komandu F-FDTL sei reforma militár 30 iha Loron FALINTIL
DILI, 06 jullu 2023 (TATOLI) – Xefe Estadu Maiór Jenerál F-FDTL, Tenente Jenerál F-FDTL, Domingos Raul Falur Rate Laek, hateten iha ámbitu komemorasaun loron FALINTIL 20 Augusto tinan ne’e, Komandu F-FDTL sei halo reforma militár na’in-30 ne’ebé tama ona ba idade reforma.
Nia dehan, husi ema na’in-30 ne’ebé atu reforma, iha mós Koronél na’in-tolu ne’ebé tama hotu lista reforma, tanba tinan ne’e, ofisiál superiór na’in-haat atu tama ona ba idade reforma.
“Iha lista definitive, membru sira ne’ebé atu ba reforma tinan ne’e iha ema 30. Inklui mós kuadru superiór sira, iha Koronél nain tolu”, Tenente Jenerál Domingos Raul Falur Rate Laek hateten ba jornalista sira iha Kuartel F-FDTL, Fatuhada, kinta ne’e
Nia dehan, Komandu F-FDTL halo reforma ida ne’e bazea ba lei militár ne’ebé Governu aprova ona no publika ona iha jornál katak militár ne’ebé atinje ona idade 60 tenke reforma tanba ne’e komandu hahú tinan ne’e implementa lei.
“Idade 60 ne’e reforma obrigatóriu, ne’e lei mak hateten, hanesan ha’u idade 70 sei iha ne’e sei halo tan saida. Ha’u nia hakarak ha’u mós reforma ona, maibé tanba desizaun polítika, buat ida Vise Xefe Estadu Maiór Jenerál no Xefe Estadu Maiór Jenerál Forsa Armada, ne’e desizaun polítika oituan ne’ebé ita tenke obeserva ida ne’e”, Falur adianta.
Nia dehan, tempu ona atu reforma ba membru hirak ne’ebé tama ona ba idade 60, nune’e bele halo traferénsia jenarsionál atu bele dezenvolve instituisaun F-FDTL ho di’ak liután no buras liután.
Tenente Jenerál mós konfirma katak iha ámbitu komemorasaun loron FALINTIL 20 augusto tinan ne’e Komandu F-FDTL mós sei halo promosaun ba Koronél ida ne’ebé mak agora daudaun asume hela kargu iha Komandante Komponente Navál ba deviza Brigadeiro no proposta promosaun ne’e entrega ona ba atuál Ministru Defeza.
Aleinde ne’e, Falur sei halo promosaun deviza ba membru F-FDTL hosi deviza sarjentu, kapitaun, Mmijór to’o ba koronél maibe sei deside iha reuniaun Konsellu Promosaun Militár ne’ebé prezide direta hosi Xefe Estadu Maiór Forsa Armada Interinu Koronél José da Costa Soares ‘Trix’ ne’ebé halo iha tempu badak.
Jornalista: Natalino Costa
Editór : Zezito Silva
