DILI, 06 jullu 2023 (TATOLI)–Ministru Estadu Negósiu Estranjeiru Japaun, TAKEI Shunsuke, hasoru malu ho Primeiru-Ministru (PM), Kayrala Xanana Gusmão, hodi entrega karta felisitasaun hosi Primeiru-Ministru Japaun, Fumio Kishida Kisida.
Enkontru ne’e realiza durante oras ida, iha sala reuniaun Gabinete Froteira Máritima, Palásiu Governu, kinta ne’e.
“Sente previléjiu no onradu hala’o vizita kortejia no troka ideia ho Primeiru-Ministru, Xanana Gusmão. Hau mós entrega diretamente karta kongratulasaun hosi Primeiru-Ministru, Fumio Kishida ba Primeiru-Ministru,” TAKEI Shunsuke, hateten hafoin hasoru malu PM Xanana.
Biban ne’e, Ministru TAKEI hato’o felisitasaun ba governasaun foun hodi afirma kompromisu Japaun nian ba Timor.
“Naturalmente Japaun ho Timor-Leste hanesan parseiru importante hodi partilla valór universál no ami gosta kolabora estreitamente ho Timor-Leste,” nia akresenta.
Asuntu importante ne’ebé diskute durante reuniaun maka reafirma asuntu kooperasaun sira no apoia Timor-Leste nia adezaun ba Asosiasaun Nasaun Sudeste Aziátiku (ASEAN, sigla inglés).
Notísia relevante : Japaun mantein reforsa kooperasaun ho Timor-Leste
Iha biban hanesan, Primeiru-Ministru, Kayrala Xanana Gusmão, hateten, Timor-Leste impresionadu tanba Governu japonéz haruka Ministru Negósiu Estranjeiru mai.
“Atu dehan Governu agora ne’e só bele sai lijímu depois aprova ninia programa, tanba ne’e maka ami ko’alia apoia Japaun nian desde uluk to’o agora, ha’u mós la haluha grupu Parlamentár japonéz agora mate hotu ona, ne’ebé uluk apoia ita durante funu,” Xanana tenik.
Parte rua ko’alia mós kooperasaun ne’ebé halo no sei estabelese área foun, maibé hafoin aprova programa IX Governu.
“Sira husu programa Governu ne’e se bele karik fó ba Embaixadór Japaun iha Timor-Leste para sira mós hatene planu asaun anuál tinan 2024 atubele haree hodi bele apoia,” PM adianta.
Xefe Ezekutivu salienta katak, parte rua konversa ho sinseru kona-ba saida de’it maka presiza iha kooperasaun iha tinan sira tuir mai.
Enkontru ne’e akompaña hosi Ministru Negósiu Estranjeiru no Kooperasaun, Bendito Freitas no hosi Embaixadór Japaun iha Timor-Leste, Tetsuya KIMURA.
Jornalista : Antónia Gusmão
Editora : Julia Chatarina
