Diretór Edukasaun Covalima observa direta kondisaun eskola EBF 1-2 Zulo

COVALIMA, 07 jullu 2023 (TATOLI)—Diretór Servisu Munisipál Edukasaun Covalima, Francelino Freitas Carvalho, akompañadu hosi Superintendente halo observasaun direta  ba kondisaun ensinu Eskola Bázika Filiál (EBF) 1-2 Zulo ne’ebe afetadu ba dezastre naturál ho tipu erosaun iha suku Zulo, postu Zumalai, munisipiu Covalima.

“Ha’u mai haree direta kondisaun ensinu Eskola Bázika Filiál 1,2 Zulo ne’ebe afetadu ba dazastre naturál ho tipu erosaun ne’ebé halo eskola nakfera,” Francelino Freitas Carvalho hateten ba Agencia Tatoli, iha resintu EBF 1-2 Zulo, sesta ne’e

Tanba ne’e, nia dehan, estudante sira labele hala’o prosesu aprendizajen nune’e presiza buka alternativa hodi sira bele hala’o prosesu aprendizajen ho normál.

“Bazeia ami halo identifikasaun uma tolu sala sia (9) ne’e, estudante sira labele hala’o prosesu aprendizajen ho normal,” nia dehan.

Diretor edukasaun Covalima ne’e sei koordena ho profesór no inan-aman sira hodi buka solusaun hamutuk.

Tuir dadus estudante ne’ebé eskola iha ensinu Eskola Bázika Filiál 1-2 Zulo ne’e, iha estudante sira hamutuk 119 ho profesó na’in-ualu (8).

Jornalista : Celestina Teles

Editór       : Cancio Ximenes