COVALIMA, 07 jullu 2023 (TATOLI)—Governu liuhusi Sekretáriu Estadu Protesaun Sivil, Mariano Reis, halo observasaun direta kondisaun fatin akontesimentu dezastre naturál ho tipu rai halai iha suku Zulo, postu Zumalai, munisípiu Covalima.
“Ohin, ha’u mai iha ne’e husu autorizasaun hosi Primeiru-Ministru Kay Rala Xanana Gusmão hodi mai observa direta fatin akontesimentu hodi haree kondisaun reál dezastre naturál iha suku Zulo, postu Zumalai, munisípiu Covalima,” Sekretáriu Estadu Protesaun Sivil, Mariano Reis, ahetetn liuhosi nia diskursu iha suku Zulo, sesta ne’e.
Governante ne’e lori Primeiru-Ministru Kay Rala Xanana Gusmão nia naran hato’o solidariedade ba vítima dezastre naturál iha suku Zulo.
Ho nune’e, nia husu ba vítima sira labele triste tanba autoridade sira evakua komunidade nune’e Governu sei fó apoiu materiál rekoperasaun ba vítima dezastre naturál.
“Akontesimentu dezastre naturál ho tipu erozaun ne’e halo inan isin-rua, ferik katuas, labarik sira labele kontinua sira nia estudu la iha susu been atu hemu no ai ha sira rai bele taka hotu nune’e ita boot sira risku ba hamlaha”, nia dehan.
Administradór Munisípiu Covalima, Francisco de Andrade, hato’o agradesimentu ba Sekretáriu Estadu Protesaun sivil tuun direta hodi observa kondisaun vítima dezastre natural iha suku Zulo-Zumalai.
“Ha’u hato’o agradesimentu ba Sekretáriu Estadu Protesaun Sivil tuun direta hosi observa situasaun no kondisaun vóitima sira-nian iha suku Zulo, postu Zumalai,” nia hateten.
Governante ne’e mós promete tempu badak sei fó apoiu materiál rekuperasaun ba vítima dezastre ho tipu ne’ebé aat totál.
Jornalista : Celestina Teles
Editór : Cancio Ximenes
