Governu orienta APC munisípiu fó apoiu emerjénsia ba vítima sira
COVALIMA, 07 jullu 2023 (TATOLI)—Sekretáriu Estadu Protesaun Sivíl, Mariano Reis, hateten hafoin asesu informasaun kona-ba dezastre naturál hosi mídia sosiál, nia fó kedas orientasaun hodi aplika alerta ida ba Komandante Autoridade Protesaun Sivil (APC, sigla portugés) iha munisípiu sira hodi halo evakuasaun no fó apoiu emerjensia ba vítima dezastre natural.
“Ha’u asesu akontese Dezastre Naturál iha mídia sosiál, ha’u orienta prezidente autoridade protesaun Nasionál katak urjente no orienta komandante operasaun munisípiu hodi fó alerta ida ba munisípiu sira hanesan Covalima, Manufahi, Viqueque, Lautém, Bobonaro no Ainaro hodi evakua vítima dezastre naturál,” Mariano Reis hateten liuhosi nia diskursu iha suku Zulo, sesta ne’e.
Governante ne’e hateten, fó orientasaun hanesan ba dahuluk atu halo evakuasaun ba vítima dezastre naturál ba fatin seguru, daruak fó apoiu umanitária emerjénsia hanesan ai-han no halo levantamentu dadus hodi fó apoiu rekuperasaun ba vítima sira.
Diretór Servisu Munisipál Protesaun Sivil Jestaun Risku Dezastre Naturál, Quinto da Costa, hateten situasaun ba Sekretáriu Estadu Protesaun Sivil katak hafoin akontesimentu dezastre, ekipa tun kedas hodi halo evakuasaun ba vítima no sira mós hetan ona apoiu emerjensia.
Udan boot ne’ebé akontese iha loron 3-4 fulan-jullu tinan 2023 ne’e la’ós komunidade suku Zulo, postu Administrativu Zumalai de’it afetadu ba dazastre naturál, maibé akontese mós iha postu sira seluk tanba komunidade postu sira hanesan postu Tilomar, Suai, Maucatar seidauk hetan apoiu emerjénsia maibé postu Zumalai hetan ona apoiu emerjénsia.
Jornalista : Celestina Teles
Editor : Cancio Ximenes
