Governu promete sei fó materiál rekuperasaun ba vítima 54 iha Zulo
COVALIMA, 07 jullu 2023 (TATOLI)—Sekretáriu Estadu Protesaun Sivil, Mariano Reis, tersa ne’e, promete semana oin Governusei fó apoiu materiál rekuperasaun ba vítima dezastre naturál ho tipu erozaun ba família vítima 54 ho kondisaun grave iha suku Zulo, postu Zumalai, munisípiu Covalima.
“Ha’u orientan ona diretór Nasionál, tarde liu tersa (11 jullu) semana oin, materiál konstrusaun no Mão de Obra to’o iha ita-boot sira nia liman. Ida-ne’e, ha’u tenke halo tanba komprómisu hosi IX Governu Konstutusionál,” Mariano Reis hatetetn ba vítima sira iha suku Zulo.
Hafoin to’o iha fatin akontesimentu hodi halo observasaun direta ba situasaun reál, nia dehan, Governu sei fó apoiu ho urjente tanba ida-ne’e responsabilidade politíka no morál hanesan Estadu no Governu.
Ho nune’e, nia mós hato’o agradesimentu ba autoridade lokál no parseiru sira tanba konsege salva populasaun sira-ne’ebé vítima ba dezastre naturál ho tipu erosaun ne’e.
Iha biban ne’e, nia orienta mós autoridade Protesaun Covalima kontinua konfirma loloos dadus hodi bele fó apoia.
Nia husu ba komunidade labele kontinua konstrui uma iha fatin risku maibé tenke identifika fatin seluk hodi bele konstrui uma iha fatin ne’ebé seguru.
Administradór Munisípiu Covalima, Francisco de Andrade, husu vítima dezastre naturál bainhira hetan apoiu materiál rekoperasaun labele kontinua konstrui uma iha nia fatin, maibé tenke identifika fatin seluk nune’e labele kontinua afetadu ba dezastre naturál.
Tanba ne’e, nia husu ba lia-na’in, xefe suku, xefe aldeia sira tenke realiza reuniaun hodi foti desizaun tenke muda hosi fatin ida-ne’e, tanba se lae tinan ba tinan sempre atende vítima dezastre naturál
Jornalista : Celestina Teles
Editor : Cancio Ximenes
