VIQUEQUE, 07 jullu 2023 (TATOLI)- Serbisu Ministériu Agrikultura no Peska (MAP) munisípiu Viqueque husu utilizadór sira-ne’ebé uza makína motorserra kado ai sira tenke rejista molok uza tesi ai iha munisípiu Viqueque.
Tuir Xefe departementu Planta no Indústria (MAP) Viqueque, Helder Danel Amaral, hateten, despaisu husi diretór jerál kona-ba Rekolla retribuisaun rejistu Motoserra ne’ebé bazeia ba Diploma Ministériu Agrikultura no Peskas Númeru;64/DM/MAP/X1/2022 loron 21 Dezembro 2022 iha Kapitlu II, artigu 3 alinea 6 haktuir katak “Empreza komersiál nian sira, liuhusi kualifikasaun rasik (ki’ik, natón/médias ka bo’ot), sira hakru’uk ba pagamentu emolumentus (sai sujeita ba pagamentu retribuisaun/gratifikasaun/bonus) iha emisaun rejistu lisensa hodi tula no uza makina motosserra nian, sei determina hosi Diresaun Jeral Florestas, Kafé no Plantas Industriál (DJFKPY) liuhusi aprovasaun Ministra Agrikultura no Peskas nian.
Tuir artigu refere iha Diploma Ministeriál ida ne’e, maka diretór jerál Floresta Kafé no Plantas Industriál sira liuhusi despaisu ida ne’e desidi valór retribuisaun rejistu motoserra ho montante USS 5.00 (Dolár Amerikanu Lima).
“Ho nune’e ami hahú simu rejistu utilizadór motoserra sira iha Viqueque iha loron 1 jullu to’o dezembru tinan ida-ne’e. Bainhira utilizadór sira halo rejistu selu taxa retribuisaun $5 kada motor sera, durasaun rejistu durante fulan neen. Se na’in motorserra sira lakohi rejista maka liu fulan neen sei multa, depende ba diploma ministériu nian,” Helder Daniel Amaral, ba Agência Tatoli, iha ninia knaar fatin, Beloi, sesta ne’e.
Tanba ne’e, nia dehan ba motorserra sira-ne’ebé la rejistu sei bandu tesi ai nune’e ba ema ne’ebé rejistu maka iha diretu hodi tesi ai tanba prova katak iha dokumentu legál, maibé ida ne’ebé mak la rejistu tesi ai MAP konsidera ilegál.
“Ho ida-ne’e maka ami husu ba na’in motoserra sira iha munisípiu Viqueque hakbesik mai serbisu MAP hodi halo rejistu ba makína motoserra. Se karik la rejistu tuir prazu ne’ebé iha bainhira tesu ai maka guarda sira hetan konsidera ilegál. Tan ne’e abitante sira ne’ebé iha makína motoserra rejista,” nia apela.
Nia dehan, motor sera iha munisípiu Viqueque barak, maibé utilizadór sira la rejista nune’e ba oin serbisu MAP rejista agora fulan jullu to’o dezembru tenke rejista
Enkuantu, tuir dadus makína motorsera iha munisípiu Viqueque kuaze 200 resin maka halo ona rejista iha serbisu MAP Viqueque.
Jornalista : Vitorino Lopes da Costa
Editór : Rafael Ximenes de A. Belo
