Muzeu Rezisténsia reabilita ona abrigu subterráneu sia iha munisípiu haat
DILI, 07 jullu 2023 (TATOLI) – Arkivu no Muzeu Rezisténsia Timorense (AMRT) finaliza ona reabilitasaun ba abrigu subterráneu sia ne’ebé lokaliza iha munisípiu haat ho orsamentu rihun $200-resin.
Diretór-Ezekutivu no Prezidente AMRT, Hamar Antoninho Alves, hatete abrigu refere neen iha munisípiu Ermera, ida iha Dili, ida iha Liquiçá no seluk iha Bobonaro.
“Abrigu subterráneu hamutuk 20 no ita konsege reabilita ona sia ne’ebé uluk ita-nian gerilleiru sira uza hodi funu hasoru inimigu sira. Abrigu sia ne’e rasik ba futuru sei sai mini muzeu, nune’e bele atrai komunidade sira bele hakbesik-aan atu hatene liután istória abrigu ne’e rasik”, prezidente AMRT afirma ba Tatoli.
Ba abrigu 11 ne’ebé seidauk reabilita ne’e, Hamar Alves esplika katak nia dezeñu sei iha prosesu nia laran no tékniku sira seidauk oferese mai Muzeu.
Hamar Alves salienta katak ba dezeñu ne’e rasik besik finaliza ona no hein atu monta de’it bainhira IX Governu normaliza funsionamentu amezmu tempu bele halo mós serimónia abertura ba abrigu sira ne’e.
“Ita-nian intensaun ne’e atu atrai públiku sira atubele hatene no hakbesik-aan mai fatin istóriku sira ne’e, la’ós atu vizita de’it, maibé bele mós hatene istória Timór nian ne’ebé sei tau iha ne’ebá”, dehan.
Jornalista: Tomé Amado
Editora: Maria Auxiliadora
