DILI, 07 jullu 2023 (TATOLI)—Ministra Negósiu Estranjeiru Austrália nian, Penny Wong, sesta ne’e, hala’o sorumutu ho Prezidente Republika Jose Ramos Horta, hodi diskute kona-ba kooperasaun entre Timor-Leste no Austrália.
Ministra Negósiu Estranjeiru, Penny Wong no delegasaun ne’e hasoru malu ho Xefe Estadu hahú hosi tuku 10h00 to’o 11h00 dadeer, no kontinua hala’o sorumutu ho Primeiru-Ministru, Kay Rala Xanana Gusmão.
“Ha’u hakarak fó sai katak, ha’u kontente tebes atu fila mai vizita Timor-Leste no ne’e mak ha’u-nia vizita datoluk. Enkontru ho Prezidente la’o di’ak no ami diskute oinsá atu serbisu hamutuk ho ami-nia parseiru sira iha futuru,” Ministra Negósiu Estranjeiru Austrália, Penny Wong, hafoin hasoru malu ho Prezidente Repúblika, José Ramos Horta, iha Palasiu Prezidensiál Nicolau Lobato, Bairru Pite, sesta ne’e.
Penny Wong hateten, nia mai TL atu hametin relasaun entre nasaun rua ne’e ho Governu foun, no aleinde ne’e nia parte mós sei hasoru malu ho Ministru Negosius Estranjeiru no Kooperasaun (MNEK), Bendito Freitas, hodi diskute mós kona-ba dezenvolvimentu TL nian iha futuru.
Nune’e mós, iha sorumutu ne’e atu diskute kona-ba adezaun Timor-Leste nian ba Asosiasaun Nasaun Sudeste Aziatiku (ASEAN), fó apoiu ba TL iha setór oioin inklui iha área seguransa no defeza.
Jornalista : Osória Marques
Editór : Cancio Ximenes
