COVALIMA, 08 jullu 2023 (TATOLI)—Sekretáriu Estadu Protesaun Sivil, Mariano Reis, hateten akontesimentu dezastre naturál ho tipu rai halai iha suku Zulo, postu Administrarivu Zumalai, fó impaktu ba estrada ligasaun hosi suku Zulo ba munisípiu Bobonaro kotu totál hodi difikulta movimentu ema no transporte públiku ba-mai.
Notísia Relevante: Governu entrega apoiu emerjénsia ba vítima dezastre naturál iha Zulo
Governante ne’e hateten, nia ho ekipa halo observasaun direta ba situasaun akontese dezastre naturál ho tipu erosaun iha suku Zulo ne’e fó impaktu ba infraestrutura hanesan Estrada balun aat no kotu.
“Kona-ba infraestrutura hanesan Estrada, ha’u sei lori dokumentu no informa ba Ministru Obra Públika no Planu Investimentu Estratéjiku atu haree kestaun ne’e,” Sekretáriu Estadu Protesaun Sivil, Mariano Reis, hateten ba Agência Tatoli iha suku Zulo, sesta ne’e.
Entertantu, udan-boot ne’ebé akontese iha loron 3-4 fulan-jullu tinan 2023 ne’e lori tristeza ba komunidade tanba komunidade sai vítima hodi lakon hela fatin no sasán sira seluk tan.
Durante akontese udan, komunidade suku Zulo akontese dezastre ho tipu rai halai maibé afetadu ba komunidade postu administrativu sira hanesan Tilomar, Suai, Maucatar ne’ebé to’o agora seidauk hetan apoiu emerjénsia maibé postu Zumalai hetan ona apoiu emerjénsia.
Antes ne’e, Diretór Servisu Munisipál Obra Públika, Alberto Cardoso, hateten durante akontese udan boot identifika kondisaun ponte Lomea ne’ebé lokaliza iha suku Tashilin, postu Zumalai, ponte Rai Ketan iha suku Labarai, postu Suai no ponte Karau Ulun iha suku Ogues, postu Maucatar, munisípiu Covalima difikulta movimentu transporte públiku tanba ponte kotu.
Jornalista : Celestina Teles
Editór : Cancio Ximenes
