DILI, 08 jullu 2023 (TATOLI)—Diretór Nasionál Promosaun Direitu ba Ema ho Defisiénsia (DNPDED), Mateus da Silva, hateten tinan ida-ne’e MSSI fó apoiu ba organizasaun Ema ho Defisiénsia (EhD) hamutuk hitu (7) iha Timor-Leste.
Nia dehan, apoiu ida-ne’e atu ajuda organizasaun sira no organizasaun sira mós ajuda Governu para atu hala’o servisu ba inkluzaun sosiál liga ho defisiénsia sira-nia nesesidade no oinsá atu promove sira.
“Tanba ne’e, Governu kontinua asegura organizasaun ema ho defisiénsia sira atu servisu liuhosi meiu oioin, hanesan ida mak estudu nasionál liuhosi assisténsia sosiál, ita kontinua apoiu ai-han ba maluk sira. Bainhira ita halo avaliasaun atu identifika maluk ho defisiénsia sira-ne’ebé mak sira-nia kondisaun moris ne’e susar. Agora, ami simu ona rezultadu avliasaun liuhosi relatóriu sosiál sira entaun ekipa sei halo avaliasaun ba proposta sira-ne’e, hafoin sé mak elizivél atu asesu ba apoiu kulturál,” nia hateten ba Agência Tatoli, hafoin partisipa serimónia nasionál ba ema ho defisiénsia, iha salaun MTK, Merkadu Lama, foin lalais ne’e.
Mateus hateten, Governu kontinua servisu hamutuk ho organizasaun EhD sira atu estabelese Konsellu Nasionál ba maluk defisiénsia sira, nune’e mós asegura atu implementa koneksaun direitu ba EhD liuhosi Estadu Timor-Leste ninia kompromisu ne’ebe ratifika tiha ona konvensaun direitu ema ho defisiénsia.
Diretór Asosiasaun Defisiente Timor-Leste (ADTL), Cesário da Silva, hateten durante ne’e MSSI apoiu fundu liuhosi Instituisaun Solidariedade Sosiál (ISS) ba organizasaun sosiedade sivil hotu-hotu iha Timor-Leste.
“MSII apoiu fundu ba organizasaun sosiedade sivil hotu-hotu, liu-liu organizasaun hirak ne’ebé halo servisu karitativa no ba atividade ema ho defisiénsia nian,” nia hateten.
Jornalista : Osória Marques
Editór : Cancio Ximenes
