DILI, 10 jullu 2023 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten Uma Naroman ba Povu (UNP) ne’ebé hetan estraga hosi dezastre naturál hein desizaun superiór, no ekipa tékniku PNDS prontu atu konstrui fali uma foun.
Notísia Relevante: Governu dasia presiza kontinua programa UNP ho PMOPA
“Ami prontu atu konstrui fali foun ba uma ne’ebé mak aat ona hanesan iha munisipiu Ainaro nian. Maibé, ha’u atu dehan ba komunidade hotu-hotu katak polítika halo uma ba povu ne’e, ita konstrui iha uma tuan nia fatin. Ne’e, hatudu fatin ne’e seguru no di’ak ba uma mak ita harii, agora ikus dezastre dehan fali materiál laiha kualidade. Molok halo uma ita identifika uluk fatin katak la halo iha ai-hun boot nia okos, iha foho lolon, mota no tasi ninin sira, inklui rai ne’ebé haree la seguru ka risku ba rai halai. Iha matadalan hateten klaru ona,” nia dehan ba Agencia Tatoli, ha nia kna’ar fatin, Colmera, segunda ne’e.
Maibé, nia dehan, ho dezastre natural ne’e PNDS sei responsabiliza ba estagus sira-ne’e, tanba teknikamente uma ne’ebé monu ne’e la reprezenta uma rihun ida mak kualidade la di’ak, ne’e lae.
“Kualidade ami sempre garante tanba ami la’o tuir matadalan PNDS nian. no daudaun ne’e ami-nia ekipa foti dadus no halo levantamentu hodi informa ba parte superiór sira katak ida-ne’e afeta hosi dezastre naturál nian,” nia dehan.
Dezastre nuturál ne’ebe akontese ne’e estraga sasán barak la’ós de’it estraga Uma Naroman ba Povu (UNP) maibé estrada sira mós barak mak kotu inklui komunidade balun nia uma mak hetan estragus.
“Ha’u hakarak atu dehan katak ita labele sukat reprezenta aat ba uma ne’ebé halo rihun tomak iha territóriu nasionál. Buat dezastre natural ne’e, ita la espera no ita labale kompara ho fallansu tékniku katak ita harii uma ida maibé ida-idak monu. Ida-ne’e ita labele kompara,” nia esplika.
Ho preokupasaun komunidade nian ba kualidade materiál ne’e, nia dehan, bainhira haree iha fotografia ne’e katak ekipa la tau sinta besi iha leten maibe bainhira haree besik ne’e, besi nakratak sai hela iha uma naksobu ne’e.
“Bainhira dehan laiha kualidade ne’e kestionavél tebes, tanba de’it uma ida-rua ne’ebé hetan estragus no kauza hosi dezastre ne’e, labale halo sasukat ida uma ida-rua kompara ho uma barak ne’ebé ita konstrui ne’e mesak la kualidade, ne’e la loos ida,” nia dehan.
Totál Uma Kbiit Laek (UKL) no Uma Naroman ba Povu (UNP) ne’ebé mak VIII Governu Konstitusionál harii duarnte tinan tolu nia-laran, hahú hosi 2021-2023 hamutuk uma 9.854 mak Governu konstrui iha territóriu nasionál.
Jornalista : Osória Marques
Editór : Cancio Ximenes
