DILI, 10 jullu 2023 (TATOLI)–Diretór Ezekutivu Servisu Apoiu Sosiedade Sivíl no Auditoria Sosiál (SASCAS), Edvin Soares, hateten, projetu konstrusaun igreja Aimutin presiza tan osan ho valór millaun $1,5.
“Provizóriamente orsamentu ne’ebé atribui ba igreja hamutuk millaun $3, maibé labele finaliza projetu tuir Bill of Quantity (BoQ) ne’ebé aprezenta. Montante $3 ne’e bazeia ba rezolusaun Konsellu Ministru, nune’e orsamentu ba projetu ne’e hamutuk millaun $4,5, entaun tenke presiza tan orsamentu millaun $1,5 atu finaliza projetu,” Edvin Soares hateten ba Agência Tatoli, iha ninia knaar fatin, Palásiu Governu.
Daudaun ne’e konstrusaun la’o hela, atu finaliza projetu ho orsamentu millaun $3 maka iha hela prosesu dokumentu tanba empreza foin haruka ba SASCAS maibé tanba dokumentu no dadus la kompletu, tanba ne’e SASCAS devolve fali dokumentu ba Konferénsia Episkopál Timorense (CET, sigla portuges), no devolve tutan ba projetu na’in, Parokia Aimutin.
“Entaun husu ba empreza atu hadi’a lalais relatóriu, liu-liu dadus ba progresu atinjimentu ba projetu. Bainhira dadus sira ne’e haruka fali mai ami maka haruka ba Ajénsia Dezenvolvimentu Nasionál (ADN) hodi sira halo apresiasaun ikus ba andamentu tomak ba despeza projetu,” nia akresenta.
Notísia relevante : Progresu konstrusaun fíziku ba igreja Aimutin atinje ona 83,5%
Diretór ne’e esplika, atribuisaun orsamentu millaun $3 ne’e bazeia ba Rezolusaun Konsellu Ministru ne’ebé mensiona katak apoia ba Parokia tomak orsamentu másimu millaun $3, liu ida-ne’e kabe ba kompeténsia CET ninian tanba órgaun ne’e rasik hetan hela transferénsia finanseiru hosi Governu kada tinan, tanba ne’e la disponível atu aumenta tan millaun $1,5 tanba sei liu prosesu naruk.
“Orsamentu tinan 2023 la prevee prsamnetu ba projetu igreja Aimutin tanba pagamentu ba projetu ne’e konklui ona iha tinan 2022. Bainhira Presizaa orsamentu adisionál tenke koordena ho CET tanba akordu Governu Timor-Leste ho CET ne’e mós hateten momoos katak buat hotu-hotu ne’ebé mak na’in ba igreja katólika tenke jere liuhosi governasaun CET,” nia akresenta.
Durante ne’e ADN no SASCAS iha kooperasaun di’ak tanba kuaze projetu hotu-hotu ne’ebé mak SASCAS tutela ba serbisu ida-ne’e, ninia pagamentu bazeia ba apresiasaun ADN nian.
“SASCAS jere de’it orsamentu hodi fó apoia ba Parokia atu halo igreja ida, atu indijta empreza sé mak atu toma konta ba projetu, ne’e Parokia mak na’in tanba Parokia mak na’in ba projetu. Problema ba ami maka relatóriu ne’ebé empreza haruka mai sempre atraza, ami husu beibeik ba Parokia atu fó atensaun ba empreza ne’ebé responsabiliza ba projetu sira”, nia preokupa.
Jornalista : Antónia Gusmão
Editora : Julia Chatarina
