Sensibilizasaun prátika utiliza ai-han di’ak, komunidade prefere sosa produtu importadu
COVALIMA, 10 jullu 2023 (TATOLI)–Diretór Servisu Munisipál Seguransa Alimentár, Domingos Gusmão, hateten hosi rezultadu Governu halo sensibilizasaun prátika utiliza ai-han di’ak ba kada família ne’e, komunidade prefere liu sosa produtu importadu duké sosa produtu lokál ne’ebé faan iha merkadu.
“Iha planu asaun anuál, ita hala’o programa disemina informasaun kona-ba prátika utiliza ai-han di’ak ne’ebé la’o hela, oinsá komunidade sira prátika utiliza ai-han disponivél iha família ida-idak. Tanba, ita-nia ema sira prefere sosa produtu importadu duké produtu rasik ne’ebé sira iha,” Diretór Domingos Gusmão hateten ba Agência Tatoli, iha nia kna’ar fatin, Bairru Costa, segunda ne’e.
Nia foti ezemplu, hanesan komunidade bainhira faan manu lokál no manu-tolun iha merkadu hodi hetan osan, hafoin hetan osan ne’e, sira sosa fali produtu importadu.
“Komunidade faan manu lokál no manu-tolun iha merkadu hafoin hetan osan lori sosa fali produtu importadu. Ida-ne’e halo ita lamenta tebes ho nune’e iha ha’u-nia mandatu ita konsege disemina informasaun oinsá ita bele hatene utiliza ai-han ne’ebé ita iha,” nia dehan.
Diretór ne’e hateten, atividade disemina informasaun prátika utiliza ai-han di’ak ba komunidade sira-ne’e importante atu hasa’e komunidade nia koñesementu kona-ba utiliza ai-han di’ak.
Diresaun Alimentár realiza ona programa sensibilizasaun ba to’o iha suku sira kona-ba prátika utiliza ai-han di’ak hanesan iha suku Matai, postu administradór Maucatar, suku Kasabauk, postu Administrativu Tilomar, antes ne’e hala’o ona sensibilizasaun iha nivél postu administrativu.
Tuir dadus, funsionáriu ne’ebé servisu iha dirasaun alimentár hamutuk na’in-sia (9), diretór na’in-ida (1), xefe departamentu na’in-rua (2), kazuaál tékniku ofisiál finansa na’in-ida (1).
Jornalista : Celestina Teles
Editór : Cancio Ximenes
