Sobrevivente 120 sei hetan pagamentu pontuál hosi MSSI tinan ne’e
DILI, 10 jullu 2023 (TATOLI)—Sobrevivente vulnerável hamutuk 120 sei hetan pagamentu pontuál hosi Ministériu Solidaridade Sosiál no Inkluzaun (MSSI).
Diretór Divizasaun Solidaridade Sobrevivente iha Centro Nacional Chega, Institutu Públiku (CNC, I.P), Nelson Miranda Seixas, informa, dadus sobrevivente rejistadu iha sistema baze dadus hamutuk 1.600, ne’ebé hosi númeru ne’e hahú hosi tinan 2021 to’o 2022 ema hamutuk 330 resin mak hetan ona pagamentu no tinan ida-ne’e, iha semana kotuk CNC, I.P foin hetan kontaktu hosi MSSI liuhosi Diresaun Nasionál Reinsersaun Komunitária hodi husu CNC, I.P submete tan lista sobrevivente vulnerável liu atu hetan pagamentu pontuál.
“Dadus ne’ebé daudaun ita iha, atu hetan pagamentu pontuál hamutuk 120, ne’ebé sei prosesa hela iha fulan-agostu hanesan ne’e, sira sei hetan sira-nia direitu,” Nelson Miranda hateten ba Agência Tatoli, iha salaun CNC, I.P, Balide, segunda ne’e.
Notísia relevante : Governu halo ona pagamentu pontuál ba sobrevivente 300 resin
Nia dehan, MSSI mak prevee orsamentu ne’ebé sobrevivente atu hetan, ne’ebé tuir akordu, iha inísiu kada tinan tau $80.000 maibé ba tinan ne’e menus hosi montante ne’e.
“Ita-nia sobrevivente ne’ebé tinan ne’e atu hetan pagamentu pontuál, kada ema sei hetan $500 no sira simu dala-ida de’it,” nia tenik.
Jornalista : Arminda Fonseca
Editora : Julia Chatarina
