OÉ-CUSSE, 10 jullu 2023 (TATOLI) – Iha trimestre daruak, hahú hosi fulan abríl maiu to’o juñu 2023 ne’e, Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), konstribui reseita ba kofre Estadu hamutuk $23,063 liuhosi tratamentu dokumentu ba transporte sira.
“Relatóriu kona-bá taxa iha transporte Oé-Cusse kontribui ba kofre Estadu iha trimestre daruak ne’e $23,063,” Xefe Departamentu DRTT Oé-Cusse, Silvestre Sila Teme, ba jornalista sira iha Oé-Cusse, segunda ne’e.
Notísia relevante: Trimestre dahuluk 2023, DRTT Oé-Cusse rekolla reseita rihun $28-resin
Xefe Departamentu ne’e esplika, iha fulan-abríl konsege rekolla $6,523,00 hotál ema ne’ebé halo tratamentu dokumentu sira hamutuk na’in-383, komposta hosi rejista dokumentu transporte ualu, troka naran 32, duplikat ka Surat Tanda Nomor Kendaraan, (STNK, sigla indonézia) 10, xapa-mátrikula 10, inspesaun 119, lisensa tránzitu 37, karta kondusaun 133 no DSPL ka karta viajen estranjeiru 34.
Nune’e mós iha fulan maiu rekolla $7,734.50, hotál ema ne’ebé halo tratamentu dokumentu sira hamutuk ema na’in-515, komposta hosi rejista dokumentu transporte tolu, troka naran 54, duplikat ka STNK tolu, xapa mátrikula rua, inspesaun 181, lisensa tranzitu 69, karta kondusaun 163 no DSPL DSPL 40.
Ba fali fulan juñu rekolla $8,805.00, hotál ema ne’ebé halo tratamentu dokumentu sira hamutuk ema na’in-576, komposta hosi rejista dokumentu transporte 10, troka naran 47, duplikat ka STNK haat, xapa mátrikula haat, inspesaun 268, lisensa tránzitu 58, karta kondusaun 130 no DSPL 55.
Nia informa, DRTT ho parte Polísia Unidade Tranzitu Oé-Cusse, durante ne’e iha kooperasaun di’ak, bainhira transporte hetan apreensaun, parte tránzitu konfirma halo verifikasaun ba dokumentu sira.
“Ba dokumentu ami mak trata, karik iha dokumentu mate ka transporte ida laiha karta kondusaun, bainhira hetan prende parte tranzitu komunika ami, maibé kona-bá taxa ketak, tranzitu nian la envolve iha transporte nian,” nia katak.
Notísia relevante: Tinan 2022, DRTT Oé-Cusse hatama rihun $89-resin ba kofre Estadu
Jornalista: Abílio Elo Nini
Editór: Evaristo Soares Martins
