Ospitál Suai konserva mate-isin ne’ebé hetan iha ponte Lomea iha konjeladór
COVALIMA, 11 jullu 2023 (TATOLI)–Pesoál Saúde iha ospitál referál Suai, Eligio Agostinho de Araújo Soares, hateten sábadu semana kotuk komunidade Covalima hetan mate-isin iha ponte Lomea no daudaun ne’e konserva iha konjeladór iha mortuáriu, maibé to’o ohin loron laiha família ida mai koñese hodi hala’o serimónia fúnebre.
“Ita hotu rona komunidade hetan mate-isin iha ponte Lomea, hosi Bombeiru evakua mai iha ospitál Referál Suai. Ami haree nia mate entaun mai rai mortuáriu, maibé tanba mate-isin laiha identidade entaun ami konserva mate-isin iha konjeladór iha mortuáriu hodi hein família mai foti mate-isin iha mortuáriu,” Eligio Agostinho de Araújo Soares hateten ba jornalista sira iha Ospitál Referál Suai, tersa ne’e.
Ospitál Referál Suai laiha forensik atu identifika didiak mate isin-ne’ebé komunidade hetan iha ponte Lomea, postu Suai, munisípiu Covalima iha sábadu semana kotuk nune’e mete isin refere rai de’it iha mortuáriu.
“Ami laiha forensik atu identifika didiak mate-isin ne’ebé komunidade hetan iha ponte Lomea, entaun ami rai de’it iha mortuáriu no iha nia isin-loron ami la identifika buat ruma,” nia hateten.
Maske mate-isin rai iha mortuáriu Ospitál referál Suai hahú iha sábadu semana kotuk to’o ohin loron, família ruma la mai atu koñese mate-isin hodi hala’o prosesu fúnebre.
Nune’e, parte ospitál kontinua hein família sira no bainhira to’o semana ida mós família la mai ospitál sei halo kontaktu ba Sentru Solidariedade Sosiál no Inkluzaun atu hala’o prosesu fúnebre.
Nune’e, pesoál Saúde iha Ospitál Referál Suai husu autoridade Covalima atu fahe informasaun ba komunidade, nune’e bele identifika mate-isin ne’ebé hetan iha sábadu semana kotuk iha ponte Lomea suku Tashilin, postu Zumalai entre suku Beco, postu Suai, munisípiu Covalima.
“Ami husu ba autoridade Covalima atu halebar informasaun ba komunidade bainhira família sira identifika mate-isin bele foti lalais iha mortuáriu, nune’e bele halo serimónia fúnebre,” nia hateten.
Komandante PNTL Munisípiu Covalima, Superintendente Polísia Basilio de Jesus, hateten komunidade hetan mate-isin iha ponte Lomea iha sábadu semana kotuk ne’ebé agora rai hela iha mortuáriu óspital Suai.
“Mate-isin ida-ne’e ita hetan iha mota laran ponte Lomea iha sábadu 18h30 iha parte suku Tashilin, postu Zumalai entre Suku Beco, postu suai, munisípiu Covalima,” nia dehan.
Hafoin hetan mate-isin iha sábadu no iha loron domingu hetan informasaun hosi Komandante munisípiu Bobonaro informa katak sidadaun Bobonaro ida la tama uma maibé iha loron segunda hetan ona mate-isin iha parte Bobonaro.
Mate-isin ne’ebé hetan iha mota Lomea deskonfia mota mak lori, tanba laiha identidade iha tempu ne’e mate isin entrega kedas ba óspital referál Suai ne’ebé to’o ohin loron sei iha mortuáriu, bainhira sé mak sente nia família lakon bele mai iha mortuáriu óspitál Suai.
Tanba ne’e, nia dehan, Polisília Nasionál Timor-Leste labele identifika detallu mate-isin ne’ebé agora rai hela iha mortuáriu, bainhira iha semana-ida mate-isin laiha família sei entrega ba Ministériu relevante atu halo fúnebre.
Konaba mate-isin refere kamandu submete ona ba Ministériu Públiku, bainhira entrega mai fali komandu sei koordena ho óspital no Sentru Solidariedade Sosiál atu hala’o prosesu fúnebre.
Munisípiu Covalima iha postu administrativu hanesan Fatululik, Fatumea, Suai, Zumalai, Maucatar, Tilomar, Fatumea no Fohorem nafatin husu atu monitoriza família sira, nune’e bele hatene mate-isin ne’ebé rai iha mortuáriu ne’e.
Jornalista : Celestina Teles
Editór : Cancio Ximenes
