DILI, 12 jullu 2023 (TATOLI) – Sekretáriu Estadu Komunikasaun Sosiál (SEKOMS) Expedito Dias Ximenes, hasoru malu ho Embaxadora Portugál iha Timor-Leste, Manuela Bairos hodi ko’alia kona-ba dezenvolvimentu setór komunikasaun no kapasitasaun no formasaun lian portugés ba jornalista sira iha Timor-Leste.
“Ha’u ho embaxadora hasoru malu hodi ko’alia kona-ba dezenvolvimentu setór komunikasaun iha Timor-Leste, oinsa haree mós ba kooperasaun entre ita ho Portugal kona-ba formasaun lian portugés ba jornalista-sira”, Expedito dehan ba jornalista sira iha Palásiu Governu, tersa ne’e.
Nia dehan, kapasitasaun no formasaun lian portugés ba jornalista sira importante tebes tanba ne’e tenke kontinua nafatin ba oin liuliu formasaun sira ne’ebé Instituto Camoês fó no seluk tan, tanba produtu hirak ne’ebé durante Instituto Camoês fó iha duni rezultadu signifikativu.
“Formasaun ba jornalista sira importante tebes, liuliu konsultór lian portugés sira durante ne’e iha ona, ita kontinua hanaruk tan sira-nia misaun, ba Instituto Camoês ne’e importante tebes, tanba durante ne’e jornalista barak mak aprende lian portugés ho di’ak”, nia relata.
Iha oportunidade ne’e, nia husu ba Portugal atu fasilita liután formasaun iha lian portugés no tékniku hakerek notísia ba jornalista sira iha Timor-Leste atu mellora liután kapasidade jornalístiku.
Iha fatin hanesan, Embaxadora Portugal iha Timor-Leste Manuela Bairos, hateten Portugal nafatin komprometidu atu apoiu Timor-Leste iha área komunikasaun sosiál no fó formasaun ba jornalista sira.
“Ami nafatin apoiu Timor-Leste atu kapasita jornalista sira iha lian portugés no tékniku hakerek nian, tinan naruk nia laran Portugal apoiu ona Timor-Leste, maibé agora ita nafatin hametin liutón kooperasaun ne’ebé mak iha ona” nia konklui.
Jornalista: Hortencio Sanchez
Editór : Zezito Silva
