DILI, 12 jullu 2023 (TATOLI) – Polísia Nasionál Timor-Leste (PNTL), liuhosi Departamentu Investigasaun Kriminál (DIK), ka’er tán ema na’in-ida ho konta facebook ho naran Ela Variana, tanba lansa liafuan ne’ebé ofende Primeiru-Ministru, Xanana Gusmão.
Xefe DIK Superintendente João Belo dos Reis, dehan DIK bolu Ela Variana hodi halo identifikasaun, buka hatene de’it razaun saida mak sidadaun ne’e hakerek nia konta facebook ho liafuan ne’ebé ofende lider Xanana Gusmão no atu buka hatene katak konta facebook ne’e nia mak uza ka ema seluk.
‘’Ekipa halo hela identifikasaun ba sidadaun ida ne’ebé lansa informsaun iha rede sosiál hodi ofende Xefe Governu Xanana Gusmao’’, nia afirma.
DIK halo atuasaun ba Ela Variana iha kuarta-feira, maizmenus tuku 8:00 dader, komandu lori kedan iha nia hela fatin Manleuana hodi submete ba prosesu identifikasaun.
Antes DIK to’o nia hela fatin Manleu, Ela Variana’ lakohi atu koopera ho PNTL, to’o haksesuk malu ho ajente PNTL sira kuaze menutu 25 nia-laran.
Maibé ikus mai, sidadaun feto ne’e koopera, nune’e ekipa sira transporta kedan mai Kuartel Jerál PNTL, Caicoli.
Notísia relevante : PNSIK identifika Jonn Malik eskonde iha Hera
Jornalista: Natalino Costa
Editór : Zezito Silva
