Top

PPN-WFP diskute oinsá rezolve problema má-nutrisaun iha Timor-Leste

Representative World Food Programe (WFP) iha Timor-Leste, Alba Cecilia Garzon Olivares. Imajen Tatoli/Nelson de Sousa.

DILI, 12 jullu 2023 (TATOLI)—Prezidente Parlamentu Nasionál, Maria Fernanda Lay, kuarta ne’e, simu audiénsia ho Representative World Food Programe (WFP) iha Timor-Leste, Alba Cecilia Garzon Olivares, hodi diskute kona-ba oinsá rezolve problema manutrisaun iha Timor-Leste.

Notísia Relevante: ADB investe millaun $3 rekupera má-nutrisaun iha munisipíu lima

“Ba dahuluk, ha’u mai kongratula Prezidente Parlamentu Nasionál hanesan feto dahuluk ne’ebé mak asume kna’ar ne’e iha Timor-Leste, tanba ne’e mak hakarak kongratula nia. Oportunidade ne’e, ami diskute mós oinsá atu rezolve problema má-nutrisaun iha Timor-Leste,” Representative World Food Programe (WFP) iha Timor-Leste, Alba Cecilia Garzon Olivares, hateten ba jornalista sira hafoin ramata enkontru iha PN.

WFP espresa nia apoiu ba programa hirak ne’ebé mak Governu implementa ona liga ho nutrisaun, seguransa alimentár no implikasaun hosi projetu hirak ne’ebé mak implementa ona ba dezenvolvimentu nasionál.

“Ami diskute buat barak ne’ebé ita presiza hatene kona-ba stunting (má-nutrisaun) tanba 47% má-nutrisaun iha Timor-Leste iha impaktu boot ba prosesu dezenvolvimentu nasionál,” nia dehan.

Tuir nia, labarik ne’ebé mak sofre má-nutrisaun mak labarik sira-ne’ebé laiha dezenvovilmentu di’ak atu iha mudansa.

Entaun saida mak ita presiza halo mak haree atividade sira-ne’ebé presiza atu halo hodi rezolve problema má-nutrisaun.

“Atividade hirak ne’e mak hanesan hadi’a ka dezenvolve sistema ai-han no asegura  seguransa alimentár. Fatór prinsipál ne’ebé kauza má-nutrisaun mak pobreza, tanba ema barak laiha kapasidade hodi sosa ai-han nutritive,” nia dehan.

Saida mak WFP hakarak halo mak haree  problema saida mak  hosi nutrisaun, hanesan sistema ai-han, entaun WFP implementa ona projeitu sira  kona-ba sistema ai-han hodi hametin sistema ai-han iha Timor-Leste.

“Ita sei serbisu iha nível lokál hodi apoiu Governu lokál atu bele implementa atividade sira-ne’ebé mak bele rezolve problema manutrisaun iha Timor-Leste,” nia hateten.

Iha ne’e WFP serbisu hamutuk ona ho Ministériu Saúde (MS) iha programa alimentár, Ministériu Edukasaun (ME) iha programa merenda eskolár, Ministériu Solidariedade Sosiál no Inkluzaun (MSSI) iha programa bolsa da mãe no serbisu mós ho Ministériu Agrikultura no Peska (MAP) kona-ba produsaun ai-han.

Durante enkontru, nia dehan, resposta hosi Prezidente Parlamentu Nasionál pozitivu tebes no Prezidente konsiente kona-ba problema má-nutrisaun no nia espresa interrese hakarak serbisu hamutuk ho WFP hodi rezolve problema má-nutrisaun iha Timor-Leste.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!