DILI, 12 jullu 2023 (TATOLI) – Estudante ensinu báziku no sekundária hamutuk 10.720 iha Manatuto seidauk hetan kaderneta eskolár, hatete Diretór Servisu Edukasaun Munisípiu, Graciano de Jesus Batista.
Dirijente ne’e dehan nia relata ona asuntu ne’e ba Ministériu Edukasaun, liuhusi Diresaun Nasionál Kurríkulu, maibé to’o agora seidauk iha resposta.
“Ami preokupa tebes tanba kuaze tinan lima ona ami-nian estudante sira metade husi totál ne’ebé rejista seidauk hetan kaderneta eskolár”, Graciano de Jesus afirma ba Tatoli via telefone.
Nia dehan estudante hamutuk 10.720 ne’ebé seidauk hetan kaderneta ne’e kompostu husi primeiru no segundu siklu na’in-9.220 no ensinu sekundáriu hamutuk 1.500.
“Totál estudante sekundáriu hamutuk 2.755 ne’ebé rejistadu na’in-1.255 maka iha ona kaderneta, agora hela de’it 1.500. Alunu eskola bázika hamutuk 12.851 ne’ebé rejistadu 9.220 maka seidauk iha kaderneta ne’e”, salienta.
Responsavel ne’e realsa katak estudante 3.631 iha eskola bázika terseiru siklu nian kuaze hetan hotu ona kaderneta eskolár. Tanba ne’e, nia husu nafatin ba diresaun kompetente atu tau atensaun ba asuntu ne’e hodi ajuda inan-aman sira bele akompaña progresu ka rezultadu sira-nian ona liuhusi ezame sira.
Diretór Unidade Kurríkulu Nasionál, Mateus do Rosário, haktuir katak asuntu kaderneta ne’e sira konsidera nafatin nu’udar kestaun importante ida iha diresaun nia laran, maibé tanba kualidade mákina impresaun ne’e ki’ik, entaun sira labele halo produsaun dala ida no tuir kapasidade mákina nian.
“Ita iha mákina ne’ebé oferese husi nasaun Xina ne’e ninia kapasidade ki’ik. Ita labele halo produsaun barak, entaun ita tenke prodús uitoan atubele asegura nia kondisaun nune’e labele avaria”, dehan.
Jornalista: Tomé Amado
Editora: Maria Auxiliadora
