DILI, 13 jullu 2023 (TATOLI) – Ministru Juventude Desportu no Arte Kultura (MJDAK) Nélio Isaac Sarmento, dehan Estádiu Dili sei halo renovasaun iha tinan oin, finansia hosi Federation International Football Assosiation (FIFA).
“Estádiu Dili depende ba Federasaun Futeból Timor-Leste (FFTL) nia hanoin oinsa bele komunika lalais ho FIFA atu ita hahú projetu ida ne’e atu renova Estádiu Dili ba estandar internasionál, maibé tuir informasaun ha’u hetan hosi FIFA sira sei hahú iha tinan oin”, Ministru Nélio dehan ba jornalista iha Becora, kinta ne’e.
Nia dehan, prosesu hotu los ona, laiha tan problema entre rai no buat seluk tanba Governu hakarak Timor-Leste ukun-aan tinan 20-resin ona tenke iha Estádiu kategori internasionál.
“Ida ne’e hakarak ka lakoi tenke halo, ita tenke iha estádiu modelu internasionál ida, depois ida ne’e mak ita hakarak haree tan ba fatin seluk, karik iha Dili espasu sei iha, halo tan estádiu ida, laiha espasu ita bele utiliza ne’ebé iha ona no loke tan sai ba munisípiu sira atu dezenvolve tan estádiu foun”, nia relata.
Rekorda fali katak antes ne’e ekipa ida hosi AFC no FIFA halo ona levantamentu dadus no dezeñu ba estádiu ne’e no sei aprezenta fali ba Governu atu haree hafoin bele hahú konstrusaun.
Jornalista: Hortencio Sanchez
Editór : Zezito Silva
