INETL, I.P planeia halo peskiza demografia saúde iha Timor-Leste
DILI, 13 jullu 2023 (TATOLI)—Institutu Nasionál Estatístika Timor-Leste, Institutu Públiku (INETL, I.P) planeia sei halo peskiza demografia saúde iha Timor-Leste.
Prezidente INETL, I.P, Elias dos Santos Ferreira, informa, programa prioridade institutu nian iha fulan-neen tinan 2023 maka halo peskiza ba kiak iha Timor-Leste, tanba relatóriu sensu populasaun no uma-kain publika ona, agora foku ba relatóriu temátiku fraterlidade, mortalidade, no projesaun.
“Seluk mak sensu fó filafali iha outubru 2023 sei analiza no rezultadu sei publika iha 2024, depois halo diseminasaun. Seluk maka daudaun ami serbisu hamutuk ho Ministériu Saúde atu rekolla dadus ligadu ho fasilidade saúde iha territóriu Timor-Leste, maibé tanba akontese dezastre naturál ne’ebé suspende tiha, semana oin maka kontinua fali,” Prezidente INETL, I.P hateten iha programa live streaming entrevista eskluziva, iha estúdiu Agência Tatoli, Farol, kinta ne’e.
Rekolla dadus liga ho fasilidade saúde ho objetivu bele hatene kona-ba fasilidade saúde, liu-liu kondisaun liga ho infraestrutura no rekursu umanu.
“Iha tinan 2024 sei halo peskiza kona-ba demografia saúde iha Timor-Leste hodi nune’e ita bele hatene ita-nia fratelidade ne’e hira, mortalidade no númeru má-nutrisaun,” nia akresenta.
Notísia relevante : INETL rejista inflasaun grupu hotu sa’e iha maiu
Produtu estatístika nasionál iha setór oioin ne’ebé durante ne’e INETL, I.P prodús ona maka sensu populasaun no uma-kain 2004, 2010, 2015 no 2022, sensu agríkola 2019, peskiza kiak 2001, 2007, 2014 (planu 2023), peskiza demografia saúde Timor-Leste 2003, 2010 no 2016 (planu 2024), peskiza forsa traballu 2003, 2016 no 2021, peskiza emprezariál anuál desde 2010 hodi montribui ba produtu internu brutu.
Nune’e, publikasaun rutina maka Timor-Leste no munisípiu ein númeru, monta nasionál anuál, dadus komérsiu mensál no anuál, dadus kriminál sira, indikadór estatístika trimestrál, índise presu konsumidór (IPK) mensál.
Jornalista : Antónia Gusmão
Editora : Julia Chatarina
