PPN husu Sekretáriu Jerál PN-Adjuntu hala’o kna’ar ho responsabilidade

DILI, 13 jullu 2023 (TATOLI)—Prezidente Parlamentu Nasionál, Maria Fernanda Lay, kinta ne’e, fó pose ba Sekretáriu Jerál PN, Edgar Sequeira Martins, no Sekretáriu Jerál Adjuntu PN, João Rui Amaral, ba períodu mandatu iha lejislatura daneen.

“Oportunidade ne’e hato’o boas-vinda ba Sekretáriu Jerál no nia Adjuntu ne’ebé retoma ninia serbisu dejeza muito sorte, no kargu ne’e hanesan responsabilidade serbisu no dezáfiu oioin ho pasiénsia iha lideransa administrasaun parlamentár no ekipa téknika. Iha ita-boot sira-nia kompromisu onra ne’ebé hala’o klaru atu serbi kumpre de’it tuir lei no dedika ho forsa hodi serbi populasaun Timor-Leste,” Prezidente Parlamentu Nasionál, Maria Fernanda Lay, hateten iha nia diskursu bainhira fó pose ba dirijente sekretariadu PN iha uma fukun Parlamentu Nasionál.
Nia husu atu koopera ho dirijente hotu no funsionáriu hotu iha Parlamentu Nasionál ho Sekretáriu Jerál foun mekanizmu komunikasaun ierárkia ne’ebé hatuur klaru ona iha lei Parlamentu nia funsionamentu hodi serbisu hamutuk dignifika PN hanesan uma demokrasia iha lejislatura daneen.
Líder másimu segundu órgaun soberania daruak ne’e hato’o agradese ba serbisu Sekretáriu Jerál sesante ba ninia dedikasaun valiozu serbisu ne’ebé hala’o serbisu PN durante mandatu no instituisaun ne’e harii to’o ohin loron.
Prezidente Komisaun Funsaun Públika (KFP), Faustino Cardoso, hateten serimónia pose ba Sekeretáriu Jerál ho nia adjuntu atu serbi no apoiu lejislatura daneen iha Parlamentu Nasionál.
Eventu ne’e, liga ho profisionalizmu no hanesan responsabilidade boot liga ho pasajen responsabilidade ba kada ema, no hanesan kultura ida presiza funsiona kolaborasaun iha funsaun públika inklui iha sekretariadu PN.
“Entaun lori naran KFP dahuluk kongratula Prezidente Parlamentu Nasionál ho ekipa hodi konvida marka prezensa iha ne’e sai testamuña no hato’o mós mensajen, eventu solene termu pose inisiu mandatu lejislativu daneen, asume kargu ho responsabilidade boot,” nia hateten.
Sekretáriu Jerál PN, Edgar Sequeira Martina, hateten ohin pose ba dirijente foun sekretariadu PN entaun serbisu foun ne’ebé tenke hala’o hosi ohin ba oin, hodi asegura funsionamentu administrasaun parlamentár hodi nune’e bele la’o di’ak asisténsia ba funsionamentu iha PN rasik.
“Ami-nia responsabilidade mak ne’e atu asegura funsionamentu iha Parlamentu ne’e la’o ho di’ak para ita-nia nai Deputadu sira bele hala’o serbisu ho di’ak tuir ida-idak nia kna’ar,” nia hateten.
Enkuantu, dirijente sekretariadu PN ne’e hetan nomea hosi Prezidente Parlamentu Nasionál rasik ne’ebé iha serimónia solene pose ne’e halo termu pose no juramentu.
Sekretáriu Jerál PN, Edgar Sequeira Martins, antes ne’e asume kargu Diretór ba área importante balun iha Ministéiru Administrasaun Estatál (MAE) no Sekretáriu Jerál Adjuntu antes ne’e asume ona kargu hanesan iha lejislatura dalimak no iha lejislatura daneen retoma fali de’it.
Jornalista : Nelson de Sousa
Editór : Cancio Ximenes

