PPN-JSMP diskute melloramentu fiskalizasaun iha lejislativa daneen

DILI, 13 jullu 2023 (TATOLI)—Programa Monitorizasaun Sistema Judisiál (JSMP, sigla inglés), kinta ne’e, hala’o enkontru ho Prezidente Parlamentu Nasionál (PPN), Maria Fernanda Lay, hodi diskute kona-ba melloramentu fiskalizasaun iha lejislativa daneen.
Diretora JSMP, Ana Paula Marçal, hateten JSMP hanesan instituisaun organizasaun naun governamentál ne’ebé durante ne’e halo mós monitorizasaun iha Parlamentu Nasionál, aliened monitorizasaun iha Tribunál sira no fó asisténsia legál ba vítima feto no labarik sira.
“Durante sorumutu ho Prezidente Parlamentu ko’alia kona-ba deskobrimentu sira-ne’ebé JSMP hetan durante iha lejislatura sira antes observasaun rekomendasaun progresu no dezáfiu balun presiza hadi’a iha lejislatura agora, tanba Prezidente PN hanesan dirije iha Parlamentu Nasionál ida-ne’e. Iha enkontru ne’e iyta diskute kona-ba melloramentu fiskalizasaun iha lejislativa daneen,” Ana Paula Marcál hateten ba jornalista sira hafoin ramata enkontru iha PPN iha Parlamentu Nasionál.
JSMP sujere ba PN atu fiskalizasaun iha terrenu bele hato’o relatóriu ne’ebé lalais no bolu Governu liuliu ministéiru relevante bainhira iha fiskalizasaun hetan sala ruma iha implementasaun programa presiza hadi’a imediata hodi bolu direta bele hatán, nune’e PN iha lejislatura daneen bele mellora liután.
Asuntu seluk, nia dehan, diskute kona-ba kestaun pontualidade ne’e importante atu oinsá Deputadu sira bainhira mai iha plenária PN ka komisaun atu kumpre oras, tanba atu diskute lei presiza korum no produsaun lejislativa no halo tradusaun hosi dalen portugés ba lian tetun.
Nia hateten, ba lei sira-ne’ebé produs kestaun kona-ba lingua portugés maibé bainhira implementa timoroan barak ladun hatene lian portugés, no lei sira-ne’e presiza konsultasaun públiku liután ho lian ne’ebé sidadaun sira bele komprende maske la halo tradusaun hotu maibé iha konteúdu bele tradus tiha ba lian Tetun.
Durante enkontru Prezidente PN kontente tebes ho JSMP no parte Prezidente PN hato’o óinsa haforsa liután nia serbisu kontinua halo observasaun ne’ebé di’ak no presiza nafatin JSMP nia rekomendasaun sira hodi hadi’a liután setór lejislativa no justisa nian.
Iha biban ne’e, diretora JSMP ne’e entrega mós relatóriu sira-ne’ebé durante JSMP prodús ba Prezidente PN hanesan relatóriu observasaun jerál setór justisa iha tinan 2022, peskiza kona-ba armonizasaun idade menór iha kódigu penál no kódigu sivil nian, diferensa interpretasaun liga ba kazu iha artigu sira iha kódigu penál no sumáriu serbisu no funsionamentu PN nian lejislatura liu ba ho relatóriu sira seluk tan.
Jornalista : Nelson de Sousa
Editór : Cancio Ximenes

