RAEOA implementa programa CBM ba suku 18 ho fundu rihun $100
OÉ-CUSSE, 13 jullu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), prevee rihun $100,00 ba implementasaun programa Community Base Maintenance (CBM) hodi hadi’a estrada rurál sira.
Programa CBM ne’e implementa hosi Diresaun Rejionál Infraestrutura (DRI), sei kobre suku 18 iha territóriu Oé-Cusse, ho distánsia atu hadi’a estrada sira kilometru-226 envolve grupu komunidade hamutuk 256 kada grupu iha ema na’in-21.
Diretór Rejionál Infraestrutura, Candidu Dos Reis Amaral, hateten, programa ne’e sei ezekuta hosi komunidade sira no hetan insentiva atu hadi’a rasik sira-nia estrada iha suku no aldeia hodi tulun movimentu transporse ho ema bele asesu ba merkadu ho di’ak.
“Nia objetivu atu hadi’a estrada rurál sira-ne’ebé aat iha nivél suku aldeia to’o bairru sira, hodi tulun movimentasaun transporte no komunidade sira bele asesu ba merakdu ho di’ak, no orsamentu ba hamutuk $100.000.00,” Diretór Candidu Amaral, hateten iha Oé-Cusse, kinta ne’e.
Diretór Obra Públika ne’e, esplika, programa ne’e realiza kada tinan bainhira finaliza kolleta ai-han bázika iha to’os no natar, Governu liuhosi Autoridade RAEOA insentiva komunidade, nu’udar maneira ida atu eduka, oinsa komunidade sira-nia partisipasaun kuidadu estrada rasik.
Tanba programa ne’e sei organiza direitamente hosi autoridade komunitáriu sira no sei hetan aakompañamentu hosi tékniku DRI.
“Programa ne’e ita lansa ona hahú iha suku Taiboko, programa ne’e la’os foun mak hahú maibé realiza kada tinan, atu hanorin komunidade oinsa hadi’a rasik no kuidadu estrada ba sirkulasaun loron-loron nian, maibé Autoridade fasílita insentiva kada ema ida hetan dollár $3 kada loron,” nia katak.
Tuir nia, osan dollar $3 ne’e la’os atu selu komunidade sira maibé hanesan insentivu de’it, tanba kada loron servisu hadi’a estrada depois balu la konsege fila uma atu han, entaun osan dollár $3 ne’e bele uza ba konsumu, no bele uza ba nesesidade seluk.
“Programa CBM ne’e la’os hadi’a de’it estrada taka kuak, maibé iha inisiátiva seluk, bele loke estrada foun liu-liu ba fatin izoladu sira, tanba DRI mós prepara ekipamentu liuhosi Unidade Jestaun Ekipementu atu apoiu,” nia afirma.
Jornalista: Abílio Elo Nini
Editor: Evaristo Soares Martins
