VIQUEQUE, 13 jullu 2023 (TATOLI)—Uma-kain 71 iha suku Dilor Nu-laran no suku Uma-tolu, postu administrativu Lacluta, munisípiu Viqueque asesu ona eletrisidade.
Administradór postu Lacluta, José Andrade dos Santos, agradese ba Prezidente Eletricidade de Timor-Leste, Empresa Públika (EDTL, E.P) no estrutura tomak ne’ebé ho inisiativa dada eletrisidade iha suku Uma-tolu, Bibileo no Dilor.
“Ha’u agradese ba EDTL tanba dada ona ahi eletrisidade ba sira ne’ebé durante ne’e la asesu ahi. Nune’e horiseik liuhosi Prezidente Paulo da Silva akompaña hosi Koordenadór G-JPITV Señor Teodoro no tékniku verifikasaun hamutuk ho Señor Teotónio, Sekretáriu Administradór munisípiu Viqueque, autoridade suku inklui autoridade seguransa ofisialmente halakan eletrisidade iha suku Uma-tolu no Dilor liuhosi implementasaun Projetu Eletrifikasaun Nasionál (PEN) pakote 44,” Autoridade postu hateten iha Lacluta, kinta ne’e.
Notísia relevante : Suku Liaruka Viqueque asesu ona liña eletrisidade
Administradór relata katak komunidade iha área remota seidauk asesu eletrisidade, tanba ne’e husu ba EDTL, E.P atu aselera implementasaun programa eletrifikasaun hodi nune’e komunidade bele asesu hotu eletrisidade.
Iha biban hanesan, Xefe suku Ahik, Ersilio Soares, dehan, abitante sira kuaze tinan barak nia laran la asesu eletrisidade, tanba ne’e agradese tanba agora bele asesu ona.
“Lori komunidade Dilor, Bibleo iha Lacluta nia naran hakarak fó apresiasaun no agradesimentu ba eis Primeiru-Ministru Jenerál Taur Matan Ruak, ne’ebé tau prioridade ba suku iha área remota liuhosi EDTL, E.P hodi dada eletrisidade mai suku Dilor. Kuaze tinan barak hahú hosi tempu portugés to’o tinan 2022 la asesu enerjia eletrisidade, maibé iha tinan 2023 ami bele asesu ona,” nia tenik.
Iha okaziaun ne’e, Prezidente Konsellu Administrasaun EDTL, E.P, Paulo da Silva, admite katak programa ne’e bele realiza tanba kontribuisaun no suporta hosi komunidade no autoridade lokál.
“Ha’u hakarak relata katak, liuhosi implementasaun PEN iha tinan ne’e nia rohan, iha nível suku asesu hotu ona eletrisidade. Aldeia sira ne’ebé seidauk asesu, EDTL iha programa ida bolu projetu komunitáriu, ne’ebé sei servisu hamutuk ho komunidade hodi aselera instalasaun eletrisidade ba aldeia ne’ebé seidauk asesu. Ha’u hakarak husu ba komunidade ne’ebé uza enerjia tenke kuidadu ho di’ak, tau matan ba obra sira ne’e hotu no presiza kontinua servisu hamutuk ho EDTL, E.P, bainhira ai ruma monu kona liña distribuisaun, husu atu informa direta ba tékniku hodi halo intervensaun lalais,” nia hato’o.
Prezidente Konsellu Administrasaun EDTL, E.P fó hanoin ba autoridade no abitante lokál sira ne’ebé daudaun ne’e seidauk asesu ahi eletrisidad, bele submete proposta ba EDTL, E.P hodi tau ba planu no distribui panel solár.
Implementasaun PEN iha suku Dilor Nuu-laran no Uma-tolu ho distánsia liña MT 5,2 kms, ho kustu projetu $103.569,47, durasaun implementasaun projetu fulan-tolu.
Projetu eletrifikasaun implementa hosi empreza Ekdepurmaloi Unip, Lda no JV Peregrinas Unip, Lda.
Jornalista : Vitorino Lopes da Costa
Editora : Julia Chatarina
