DILI, 14 jullu 2023 (TATOLI) – Prezidente Komisaun Funsaun Públika (KFP), Faustino Cardoso, prontu kolabora ho IX Governu atu halo auditoria ba prosesu administrasaun sira ne’ebé la’o iha Funsaun Públika.
Faustino Cardoso apresia tebes ho mensajen Primeiru-Ministru (PM), Kay Rala Xanana Gusmão, iha ámbitu simu pose, ne’ebé kompromete hakarak hala’o auditoria iha KFP no Inspesaun Jerál Estadu sira relasiona ho prosesu rekrutamentu ilegál no hapara kontratu ba funsionáriu sira sein justifikasaun.
Tuir nia, deklarasaun Xefe Governu nian ne’e fó ona opsaun ida ba Komisaun Funsaun Públika atu prepara-aan hodi kolabora iha serbisu sira kona-ba auditoria ne’ebé sei organiza iha tempu besik.
“Ami prontu koopera ho IX Governu atu garante prosesu auditoria ne’e bele la’o ho di’ak no responsabilidade ho partisipasaun másima husi parte hotu, espesialmente husi KFP rasik”, Faustino dehan iha Parlamentu Nasionál.
Ba dirijente KPF, prosesu auditoria ne’e importante tebes no daudaun iha mundu sujeita hela prinsípiu ida atu garante boa governasaun iha país sira. Prinsípiu boa governasaun ne’e atu halo kontrolu, auditoria nune’e bele identifika frakeza no dezafiu inklui ameasa sira, nune’e labele fó todan ba governasaun.
Prezidente ne’e haktuir bainhira iha prosesu auditoria ne’e la’o ona maka bele hatene problema sira ne’ebé mosu iha instituisaun Estadu sira. Governu iha obrigasaun atu ezije responsabilidade ho nune’e maka bele dehan governasaun di’ak ne’e la’o duni iha nasaun ne’e.
“Preokupasaun Primeiru-Ministru IX Governu nian ne’ebé fó sai iha ámbitu serimónia toma pose iha Palásiu Prezidensiál ne’e klaru tebes. Signifika Xefe Governu ne’e kaer duni prinsípiu boa governasaun iha ámbitu administrasaun publika nian”, salienta.
Rekorde katak Xefe Ezekutivu, Kay Rala Xanana Gusmão, antes ne’e hatete ona katak iha ninia governasaun dahuluk ba loron 120 nia laran ne’e sei fó prioridade ba pontu 17 no husi pontu sira ne’e iha pontu lima mak koa’lia kona-ba hala’o auditoria ba Komisaun Funsaun Públika no ba Inspesaun Jerál Estadu, kona-ba rekrutamentu ne’ebé ilegál no hapara kontratu laiha justifikasaun.
Jornalista: Tomé Amado
Editora: Maria Auxiliadora
