HEADLINE, SEGURANSA

MI kompromete atentu ba infraestrutura no ekipamentu PNTL

MI kompromete atentu ba infraestrutura no ekipamentu PNTL

Ministru Interiór, Francisco Guterres akompaña husi Komandante Jerál Polísia Nasionál Timor-Leste (PNTL), Henrique da Costa no Segundu komandante, Pedro Belo, vizita Kuartel Jerál PNTL, iha Kuartel jerál PNTL, Caicoli, Dili, sesta (14 /07). Imajen Tatoli/Egas Cristóvão

DILI 14 jullu 2023 (TATOLI) – Ministru Interiór (MI), Francisco Guterres, kompromete atu fó atensaun ba instraestrutura Polísia Nasional Timor-Leste (PNTL) no ekipamentu ho objetivu bele mellora servisu PNTL nian.

“Ohin ha’u mai vizita ida iha PNTL atu rona dezafiu saida mak sira hetan no saida mak sira presiza ba oin, iha vizita ne’e ha’u haree ona katak iha infraestrutura mak sei sai preokupasaun ba PNTL, inklui ekipamentu no kestaun sira seluk. Tanba ne’e Governu iha kompromete hadia sira-nia instraestrutura, tau ekipamentu, transporte no seluk”, Francisco Guterres, hateten ba jornalista sira hafoin konklui vizita ba Kuartél Komandu Jerál PNTL Caicoli, sesta ne’e.

“Polísia mós bele kria mekanizmu para haforsa manutensaun ba páz iha Timor laran tomak”, nia afirma.

Francisco adianta, tinan oin sei halo lansamentu fatuk dahuluk ba konstrusaun edifísiu Kuartel Jerál PNTL foun.

“Ha’u ohin promete ona ba sira para 2024 ita tenke halo lansamentu fatuk dahuluk ba edifísiu Kuartel Jerál PNTL. Tinan ne’e nia-laran ita sei rezolve uluk nia prosedimentu no mekanizmu  nune’e tinan oin ita tama ona prosesu lansamentu”, nia dehan.

Iha fatin hanesan Komandante Jerál PNTL, Komisariu Jerál Henrique da Costa, agradese tebes ba Ministru Interiór Francisco Guterres nia vizita mai instituisaun PNTL tanba liuhosi vizita  ne’e bele hatene situasaun PNTL nian.

Herique hateten, PNTL hanesan institusaun seguransa komprometidu kontinua servisu hamutuk ho Governu hodi hamutuk hadia institusaun ne’e sai di’ak liután.

“Lori Komandu Jerál PNTL nian naran hato’o ami-nia agradesimentu wain ba nain Ministru Interiór nia vizita ida ne’e, ita agradese ba ita-nia vizita mai iha institusaun PNTL”, nia konklui.

 Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!