MS-SAMES destroi aimoruk kontaminadu ho item neen iha Tibar
LIQUIÇA, 14 jullu 2023 (TATOLI) – Ministériu Saúde hamutuk ho Servisu Autónomu Medikamentu no Ekipamentu Saúde (SAMES) no klínika privada balun halo destroisaun ba aimoruk kontaminadu ne’ebé sei fó impaktu ba ema-nia vida hamutuk item neen iha Suku Tibar Postu Administrativu Bazartete Munisípiu Liquiça.
“Aimoruk sira ne’ebé ohin ami destroi ne’e hamutuk item neen, tanba antes ne’e Organizasaun Saúde Mundial (OMS) alerta katak aimoruk kontaminadu bainhira konsumu bele fó impaktu ba moras seluk hanesan rins no seluk tan”, Pontu Fokál ba aimoruk falsu Diresaun Nasionál Farmasia no Medikamentu MS Suzana Soares Henriques dehan ba jornalista sira iha Tibar, sesta ne’e.
Nia dehan, aimoruk item neen mak hanesan sarope parasetamol ho nia rasa sabraka, parasetamol sarope nia sabor strobery, ibuprofen antasida, unibeby caf no termokes.
Item neen ne’e hosi manufaktur tolu hanesan PT Yourindu, PT Afifarma, PT Universal Farmastikal industry hosi Indonézia.
“Bainhira OMS alerta sai katak aimoruk item neen ne’e kontaminadu ami buka tuir kedan aimoruk sira ne’e lima rejistu iha Instana farmasia no produtu ida hatama duni hosi SAMES no ita hare Indonézia fó sai fali sira nian kona-ba aimoruk sira ne’e ho kontaminadu hanesan dietilengkol, ami identifika produtu hirak ne’e eziste hotu ona iha Timor-Leste, ho nune’e hahú outubru tinan kotuk ami buka tuir rekolla hotu ohin halo destroisaun”, nia esplika.
Servisu MS buka tuir durante fulan sia, konsege rekolla duni aimoruk hirak ne’e iha teritóriu nasionál ne’ebé konsege faan ona iha merkadu no klínika privadu sira iha Dili laran no konsege rekolla hotu.
Tanba ne’e lori MS nia naran apela ba públiku la’os ministériu la kontrola maibé tanba produsaun aimoruk hirak ne’e sirkula ona ba merkadu foin OMS deteta iha kontaminasaun dalan ikus mak rekolla hodi halo destroisun.
“Maibé ita Timor-Leste seidauk konsumu aimoruk sira ne’e, tanba laiha ema ida hetan moras hosi aimoruk sira ne’e, tanba OMS fó sai ita buka tuir kedan no rekolla hotu”, nia relata.
Jornalista: Hortencio Sanchez
Editór : Zezito Silva
