DILI, 14 jullu 2023 (TATOLI)—Diretór Ezekutivu Permakultura Timor-Leste (PERMARIL), Ego Lemos no Prezidente Autoridade Rejiaun Administrativa Espesiál Oé-cusse Ambeno (RAEOA), sesta ne’e, asina akordu subvensaun públika ba kooperasaun halo prezervasaun bee no ambiente iha RAEOA.
“Kooperasaun ne’e kona-ba konservasaun rekursu bee no ambiente iha RAEOA tomak inklui fó formasaun ba joven sira oinsá hola papél importante hodi kontribui ba atividade konservasaun rekursu bee no reabilitasaun ambiente aldeia ida-idak iha RAEOA,” Diretór Ezekutivu PERMATIL, Ego Lemos, hateten, iha edifísiu ZEESM, Farol.
Hafoin asina akordu, programa sei implementa durante tinan-ida, hahú ho akampamentu Oé-cusse perma-youth camp ne’ebé sei hala’o iha loron 21 to’o 26 agostu 2023, iha aldeia Lakufoan, suku Costa, sub-rejiaun Pante Makasar, RAEOA.
Notísia relevante : PR Horta apresia inisiativa PERMATIL konserva bee
Iha akampamentu ne’e, PERMATIL sei fó formasaun ba joven sira no sei akompaña sira tuir formasaun iha aldeia 45, maibé ba atividade Oé-cusse perma-youth camp rasik sei partisipa hosi aldeia 63.
“Liuhosi kooperasaun ne’e PERMATIL hetan subvensaun $100.000 resin, ne’ebé ho orsamentu ne’e ami garante bele implementa atividade konservasaun, prezervasaun no formasaun ba joven sira ho di’ak,” nia akresenta.
Antes ne’e, PERMATIL hetan apoiu hosi Programa Nasaun Unida ba Dezenvolvimentu (UNDP, sigla inglés) no hatudu ona rezultadu iha aldeia Lakufoan, bee matan sira ne’ebé antes ne’e maran konsege konserva no sai fali, nune’e modelu ne’ebé antes ne’e uza sei replika fali iha Oé-cusse.
“Espera ita-nia prezensa iha RAEOA bele apoia autoridadade no abitante sira hodi bele serbisu hamutuk halo restaurasaun ba bee-matan sira no reabilitasaun ambiente sira iha Oé-cusse,” Diretór tenik.
Iha fatin hanesan, Prezidente RAEOA, Arsénio Paixão Bano, hateten, inisiativa halo kooperasaun ne’e tanba haree antes ne’e PERMATIL hatudu ona susesu balun iha Lacufoan.
“RAEOA halo projetu balun kona-ba bee hanesan perfurasaun bee maibé téknika ne’ebé PERMATIL halo ne’e uza rekursu, ita-nia hanesan rai sira mak restaura fali bee-matan sira, ho ida-ne’e mak ita husu PERMATIL hodi bele ajuda RAEOA atu reforsa tan servisu iha área rekursu bee,” nia tenik.
Tuir Prezidente Autoridade RAEOA, vantajen bee la’ós de’it ba ema maibé mós ba balada fuik, ai-horis, no foho ne’ebé molik, nune’e ikus mai fó fali na’in ba foho ka rai ne’ebé susar bee.
Jornalista : Arminda Fonseca
Editora : Julia Chatarina
