PN konfuzaun distribui karreta ba Deputadu foun sira
DILI, 14 jullu 2023 (TATOLI)—Prezidente Parlamentu Nasionál, Maria Fernanda Lay, hateten iha konfuzaun distribui karreta ba deputadu foun sira iha lejislatura daneen.
Nia hateten, konfuzaun tanba karreta ho marka Prado mai hosi lejislatura datoluk nian iha Deputadu na’in-haat ka lima ne’ebé la re-eleitu seidauk entrega fali karreta mai PN, nune’e iha lejislatura daneen ne’e Deputadu foun na’in-haat ka lima mak seidauk iha karreta atu distribui ba sira hodi hala’o serbisu.
“Ami iha konfuzaun, iha Deputadu na’in-haat ka lima mak seidauk iha, ida ne’e liga ho eransa lejislatura uluk-uluk nian ne’ebé balun lori tiha karreta. Maibé, ohin, ha’u hato’o iha reuniaun líder bankada Parlamentár katak, hanesan Prezidente ha’u sei rekore resposta hosi Prokuradoria Jerál Repúblika hodi determina katak sira la rezolve situasaun ne’e iha justisa, ami bele rezolve iha ne’e. Se ida-ne’e laiha, ha’u labele deside,” Prezidente PN ne’e hateten ba jornalista sira hafoin prezide reuniaun lidér bankada Parlamentár iha sala konferénsia lidér bankada, sesta ne’e.
Iha lejislatura dalimak, Deputadu sira-ne’ebé re-eleitu iha lejislatura daneen nafatin utiliza karreta ne’ebé antes ne’e sira utiliza, no deputadu ne’ebé la re-eleitu entrega fali karreta hodi distribui fali ba Deputadu foun sira iha lejislatura daneen, no Deputadu sira barak entegra fali ona hodi distribui fali ba Deputadu foun sira, maibé iha Deputadu foun na’in-haat ka lima mak seidauk iha karreta atu distribui ba.
“Dehan na’in -haat mak seidauk iha, agora balun aat tiha ona la la’o,” nia dehan.
Mezmu nune’e, Prezidente PN ne’e la fó sai kona-ba deputadu na’in-hira mak iha lejislatura dalimak la re-eleitu entegra fali ona karreta tanba la lembra.
Jornalista : Nelson de Sousa
Editór : Cancio Ximenes
