DILI, 14 jullu 2023 (TATOLI)–Ministériu Finansa (MF) realiza sesaun traballu, iha sesta ne’e, ne’ebé partisipa hosi maioria membru Governu sira inklui entidade Estadu seluk.
Vise-Ministru Finansa, Helder Lopes, informa, sesaun traballu ne’e atu diskute prosesu preparasaun Orsamentu Jerál Estadu (OJE) 2024. Aleinde ne’e mós kona-ba preparasaun Orsamentu Retifikativu, inklui jestaun finansa públika.
“Ligadu ho preparasaun OJE 2024, Governu sei haree filafali Lei Enkuadramentu Orsamentál (LEO), ne’ebé Governu anteriór halo será que sei iha relevánsia ka presiza halo ajustamentu,” Vise-Ministru Finansa, Helder Lopes hateten iha ámbitu sesaun traballu, iha Auditóriu Ministériu Finansa, Aitarak-laran, sexta ne’e.
Notísia relevante : Lei Enkuadramentu Orsamentál nu’udar pasu dahuluk reforma jestaun públika
Vise-Ministru afirma, Governu laiha hanoin atu muda buat ne’ebé mak Governu anteriór halo ona, maibé ida ne’ebé presiza hadi’a, tenke hadi’a duni.
“Prinsípiu maka kualker mudansa ne’ebé ita halo ba kuadru legál ruma ne’ebé eziste, ida-ne’e ita mai ho nosaun atu hadi’a di’ak liután, la’ós tanba Governu uluk halo no ita mai fali troka de’it, maibé ita mai ho prinsípiu ida katak kuandu buat ne’ebé presiza hadi’a di’ak liután, ita hadi’a,” Helder akresenta.
Governante ne’e dehan, tempu mós besik ona Governu sei submete proposta OJE 2024 ba Parlamentu Nasionál. Tanba ne’e maka MF aprezenta preparasaun sira ne’ebé halo ona ba membru Governu sira atu nune’e sira bele iha koñesimentu kona-ba prosesu sira.
Iha ámbitu sesaun traballu ne’e, Ministériu Finansa halo aprezentasaun ida ligadu ho jestaun finansa públika iha rai-laran to’o ohin loron ba membru Governu sira, hodi nune’e bele iha koñesimentu kona-ba jestaun finansa públika haree hosi ninia lei no sistema, Bainhira aban bainrua tama ba preparasaun orsamentu no ezekusaun nune’e bele fasilita ezekusaun ho didi’ak no halo planeamentu no orsamentu ho didi’ak.
Jornalista : Antónia Gusmão
Editora : Julia Chatarina
